Novaje tabło ŭ Ladovym pałacy Hrodna. Fota Palami.eu.
U ladovym pałacy Hrodzienskaha centra alimpijskaha reziervu pa chakiei z šajbaj ustalavali novaje tabło. Kaštavała jano 900 miljonaŭ rubloŭ. Jak paviedamili karespandentu «NN» u administracyi centra, hrošy daŭ abłasny biudžet. U tendary brali ŭdzieł čatyry arhanizacyi. Vyjhrała jaho minskaja kampanija «Pałami», jakaja ŭstaloŭvała tabło i na «Minsk-Arenie». Hetaja ž kampanija raniej afarmlała ŭ Hrodnie spartyŭny kompleks «Nioman». U administracyi ladovaha pałaca patłumačyli pieramohu «Pałami» tym, što kampanija prapanavała najlepšuju canu i aptymalnyja varyjant i termin vykanańnia pracy.
Novaje tabło ŭjaŭlaje saboj čatyry śviatłodyjodnyja ekrany, jakija dazvalajuć demanstravać videa.
Kampanija «Pałami» zasnavanaja ŭ 1992 hodzie. Zajmajecca vyrabam, pastaŭkaj, mantažom i absłuhoŭvańniem abstalavańnia dla vonkavaj rekłamy, afarmleńnia kancertnych i spartyŭnych placovak. Siarod klijentaŭ kampanii — Kiraŭnictva spravaŭ prezidenta, Minharvykankam, Ministerstva pa nadzvyčajnych situacyjach, Biełaruskaja čyhunka, Biełdziaržfiłarmonija, Fiederacyja chakieja... «Pałami» afarmlała scenu na Słavianskim bazary, dziciačym «Jeŭrabačańni».
***
Na što b vy patracili 900 000 000 biudžetnych rubloŭ?
Iryna Šłyk, vykładčyca Hrodzienskaha dziaržaŭnaha ahrarnaha ŭniviersiteta: «Dzirak» šmat — i darohi, pa jakich ni prajści ni prajechać, i miedycyna. Ale, jak fiłołah, ja ŭ pieršuju čarhu vydatkavała b takuju sumu na muziei Bykava i Bahdanoviča.
Siarhiej Čaboćka, stvaralnik i administratar błohu s13: Častku hrošaj možna było b addać u dziciačyja damy rehijona. Taksama na vyrašeńnie transpartnych prablem, naprykład, dla arhanizacyi «zialonaj chvali» na ŭčastkach, dzie čaściej za ŭsio ŭtvarajucca zatory. Na takuju sumu možna było b taksama adrestaŭravać štości z architektury.
Kaciaryna Miežaviec, žycharka Hrodna: Na maju dumku, u pieršuju čarhu treba było b patracicca na azielanieńnie horada. Bo dreŭ piłujuć šmat, a adnaŭlać źniščanaje nie paśpiavajuć.
Viktar Šałkievič, śpiavak i aktor: Heta niesurjoznyja dla horada hrošy. Što na takuju sumu zrobiš? Ja b sabraŭ usich haradskich žabrakoŭ i nakryŭ by dla ich stoł.
