Fota Intex-press
U redakcyju «Našaj Nivy» pačali masava źviartacca čytačy, jakija sami abo ich rodnyja ź niejkich pryčynaŭ nie zmahli atrymać 500 tysiač rubloŭ. Jany skardziacca, što ich niama ŭ śpisach na atrymańnie.
U suviazi z hetym nahadajem niekalki klučavych momantaŭ, što datyčać paradku atrymańnia adnarazovaj materyjalnaj dapamohi.
Chto naličvaje hrošy:
Adnarazovuju dapamohu vypłačvaje taja ž ustanova, jakaja i naličvaje piensiju/zarobak. Tamu ŭ vypadku, kali vas ź niejkich pryčyn nie ŭklučyli ŭ śpis, źviartacca treba niepasredna tudy.
Dzie atrymać hrošy:
Materyjalnaja dapamoha budzie naličanaja pa miescy atrymańnia piensii (u vypadku ź piensijanierami) i zarobku (dla biudžetnikaŭ, jakija pracujuć).
Kali piensijanier atrymlivaje piensiju ŭ banku, to 500 tysiač jamu naličać na rachunak. Kali na pošcie, to tam ža i naličać dapamohu na harodninu. Piensijaniery, jakim piensiju prynosiać na dom, takim ža čynam atrymajuć i dapamohu.
Čamu vas mahli nie ŭklučyć u śpis:
Śpisy atrymalnikaŭ dapamohi ź liku piensijanieraŭ farmujucca na padstavie piensijnych spraŭ. Adpaviedna, hramadzianie, jakija zvolnilisia z pracy da 1 vieraśnia 2011 hoda, ale ź niejkich pryčyn nie prainfarmavali ab hetym upraŭleńnia sacyjalnaj abarony, mohuć nie patrapić u śpisy. U takim vypadku treba źviarnucca z pracoŭnaj knižkaj va ŭpraŭleńnie pa miescy atrymańnia piensii.
Chto maje prava na atrymańnie dapamohi:
— niepracujučyja piensijaniery (niezaležna ad pamieru piensii);
— atrymalniki dapamohi pa dohladzie za dziećmi va ŭzroście da 3 hadoŭ; pa dohladzie za dziciom-invalidam va ŭzroście da 18 hadoŭ, a taksama za invalidam I hrupy, sastarełym, jakija dasiahnuli 80 hadoŭ; — baćki, jakim vydzialajecca dapamoha na dzicia, inficyravanaje VIČ;
— žychary Biełarusi, jakija na 1 vieraśnia 2011 h. źjaŭlalisia pracaŭnikami biudžetnych arhanizacyj i inšych arhanizacyj, jakija atrymlivajuć subsidyi, rabotniki jakich pryraŭnavany pa apłacie pracy da biudžetnikaŭ;
— vajennasłužačym, asobam načalnickaha i šarahavoha składu orhanaŭ unutranych spraŭ, orhanaŭ i padraździaleńniaŭ pa nadzvyčajnych situacyjach, orhanaŭ finansavych rasśledavańniaŭ KDK.
Na 500 tysiač nie mohuć pretendavać:
— piensijaniery, jakija pracujuć;
— asoby, jakija pa stanie na 1 vieraśnia 2011 h. znachodzilisia na dziaržzabieśpiačeńni;
— asoby, jakija atrymlivajuć piensii ź inšych dziaržaŭ i biełaruskuju piensiju za miažoj.
— vajskoŭcy terminovaj słužby;
— asoby, jakija znachodziacca ŭ miescach pazbaŭleńnia voli.
Kali vy jość u śpisie, ale ź niejkich pryčynie nie paśpieli atrymać dapamohu ŭ vieraśni, takaja mahčymaść u vas zachoŭvajecca ŭ kastryčniku, harantujuć u Ministerstvie pracy i sacabarony.
