29 hramadskich dziejačoŭ padtrymali Bialackaha.
Pravaaabaronca Valancin Stefanovič.
Lidar Ruchu "Za svabodu" Alaksandr Milinkievič.
Kiraŭnik BAŽ Žanna Litvina.
Rašeńnie pra heta abviaścili pravaabaronca Valancin Stefanovič, staršynia BAŽ Žanna Litvina i kiraŭnik Ruchu za Svabodu Alaksandr Milinkievič, jakija taksama stali siabrami inicyjatyŭnaj hrupy.
Da Arhkamiteta dałučyŭsia šerah znakavych asobaŭ z roznych krain. Siarod inšych, heta rasijskaja pravaabaronca Ludmiła Alaksiejeva, staršynia Rady Biełaruskaj Narodnaj Respubliki Ivonka Surviłła, rektar Jeŭrapiejskaha humanitarnaha ŭniviersiteta Anatol Michajłaŭ.Što važna dla praviadzieńnia kampanii padtrymki, da Arhkamiteta dałučylisia kiraŭniki najbujniejšych mižnarodnych fondaŭ, u tym liku skandynaŭskich pravaabarončych arhanizacyj — patencyjnych łabistaŭ.
U śpisie stajać imiony kiraŭnika Freedom House Dejvida Krejmiera, Nacyjanalnaha fondu ŭ padtrymku demakratyi Karła Hieršmana, kiraŭnicy Mižnarodnaj fiederacyi pravoŭ čałavieka Suchejr Biełchasen. A taksama hienieralnaha sakratara Narviežskaha Chielsinskaha kamiteta Bjorna Enhiesłanda, vykanaŭčaha dyrektara narviežskaj Mižnarodnaj fundacyi damoŭ pravoŭ čałavieka Maryi Dale,dyrektara «Chjuman rajts voč».
Staršynia Pracoŭnaj hrupy Asamblei niaŭradavych arhanizacyj Siarhiej Mackievič adznačyŭ adzinadušnaść padtrymki kandydatury Bialackaha ŭ biełaruskim niezaležnym hramadstvie.
Aleś Bialacki źbiraŭ na svaje rachunki hrošy dla padtrymki represavanych. Łukašenkaŭcy aryštavali jaho, źvinavaciŭšy ŭ niaspłacie padatkaŭ. Jon zastajecca ŭ turmie, a na jahonuju majomaść nakładzieny aryšt.
Valancin Stefanovič prahnazuje, što sud nad Bialackim moža adbycca ŭžo ŭ kastryčniku.Bialacki skončyŭ znajomicca z materyjałami spravy. Ciapier jana pierajšła ŭ prakuraturu, jakaja maje piać dzion, kab pieradać spravu ŭ sud.
Arhkamitet Arhkamitetam, a niepasredna naminavać na premiju mohuć tolki niekalki kankretnych katehoryj ludziej: deputaty parłamientaŭ, łaŭreaty minułych hadoŭ i prafiesary palityčnych navuk univiersitetaŭ. Mienavita na hetych ludziej budzie skiravana dalejšaja dziejnaść Arhkamiteta, padkreśliŭ Alaksandr Milinkievič.
Kiraŭnik Rucha za Svabodu zaklikaŭ usich biełarusaŭ vykarystać svaje suviazi i kantakty, kab zabiaśpiečyć Bialackamu jaknajbolšuju kolkaść naminataraŭ. Milinkievič zaŭvažyŭ, što nielha spadziavacca tolki na ekanamičnuju kańjunkturu. Maŭlaŭ, ekanomika pryciśnie i Łukašenka paadpuskaje viaźniaŭ. Kab ludzi vyjšli na svabodu, treba dziejničać hramadstvu, padkreśliŭ jon.
Darečy, Milinkievič pryjšoŭ na pres-kanfierencyju z pałačkaj: jon trapiŭ u balnicu z zaščymleńniem chrybtovaha nierva.
Pavodle praviłaŭ premii, vyłučeńnie pavinna adbycca da kanca studzienia 2012 hoda, a paśla taho Arhkamitet maje pravieści kampaniju ŭ padtrymku prapanovy. U pryvatnaści, zapłanavany słuchańni ŭ narviežskim parłamiencie. Mienavita
piać deputataŭ stortynha ad roznych frakcyj prymajuć rašeńnie pra łaŭreata.
Jak paviedamiŭ Aleś Łahviniec, užo čatyry byłyja łaŭreaty Nobieleŭskaj premii miru zajavili pra svaju hatoŭnaść vyłučyć Bialackaha.
