36-hadovy Remi Hajar raskazvaje, što pačaŭ epaciravać publiku paśla taho, jak jamu admovili ŭ pracaŭładkavańni ŭ abutkovaj kramie. Z taho momantu jon vyrašyŭ štodnia radavacca samomu i stvarać dobry nastroj inšym. Što praŭda, naŭrad ci nazavieš radasnymi i ščaślivymi ŭsich «achviar» jahonych žartaŭ. Remi prydumvaje roznyja situacyi, razyhryvaje ich, uciahvajučy ŭ svaje zabaŭki absalutna vypadkovych ludziej. Praces zdymajecca na videa i traplaje ŭ internet. Samyja papularnyja roliki hladziać miljony.
Naprykład, videa «ŭdziełu» Remi ŭ konkursie pa bodybiłdynhu. Jon, zvyčajnaha ciełaskładu małady čałaviek, źjaŭlajecca siarod nakačanych i bliskučych ad salaryja kulturystaŭ.
Abo rolik «Astranaŭt», u jakim Hajar źjaŭlajecca na poli dla holfa ŭ kaściumie astranaŭta i na admysłovych spružynach skača sa ściažkom, imitujučy pasadku amierykancaŭ na Miesiac.
Z časam niaŭrymślivy francuz pryciahnuŭ uvahu presy. Pakazalnym byŭ vypadak na matčy futbolnaha Kubka Francyi, na jakim prysutničaŭ eks-prezident krainy Žak Šyrak. Hajar pryjšoŭ na matč u formie kamandy-pieramožcy i paśla hulni fatahrafavaŭsia z «kalehami». A zaadno i atrymaŭ słovy adabreńnia ad byłoha prezidenta.
Časam francuz žartuje na miažy fołu i ryzyki dla ŭłasnaha zdaroŭja. Asabliva heta zaŭvažna ŭ videažartach z palicyi. Abo z prostych minakoŭ, zdolnych chutka zreahavać na śmiešački Hajara.
Pabačyć najlepšyja videaroliki Remi Hajara možna na jahonym sajcie.
