Heta vynikaje z materyjałaŭ vočnych stavak Kavalova, Kanavałava i śviedki Jany Pačyckaj, jakija 29 vieraśnia byli začytanyja ŭ sudzie.
Pačyckaja na śledstvie pakazała, što Kavaloŭ i Kanavałaŭ chvilin na 15 adasobilisia za šyrmaj u kvatery, jakuju arandavaŭ Kanavałaŭ. Jany tam pra štości šaptalisia, i, kali Pačyckaja zazirnuła za šyrmu, kab pahladzieć, što jany tam robiać, abodva — Kavałajoŭ i Kanavałaŭ — siadzieli na kukiškach kala sumki. Źmieściva sumki jana nie bačyła, pakolki Kanavałaŭ jaje chutka začyniŭ i paprasiŭ Pačyckuju vyjści pahulać.
Kavaloŭ na vočnaj staŭcy pakazaŭ, što Kanavałaŭ demanstravaŭ jamu źmieściva sumki, pry im złučaŭ pravady elektradetanatara z vybuchovaj pryładaj, tłumačyŭ jamu paradak złučeńnia šeptam. Pavodle słoŭ Kavalova, kali Pačyckaja da ich zazirnuła, Kanavałaŭ zakryŭ sumku, kab Pačyckaja nie bačyła, što ŭ joj.
Na vočnaj staŭcy Kanavałava i Pačyckaj Kanavałaŭ śćviardžaje, što Pačyckaja źmieściva sumki nie bačyła, a za štoraj pry zborcy vybuchovaj pryłady jon znachodziŭsia adzin. Kanavałaŭ nastojvaŭ na hetych pakazańniach i nijak nie prakamientavaŭ toj fakt, što jaho pakazańni adroźnivajucca ad pakazańniaŭ Pačyckaj.
