Namieśnik dyrektara pa vytvorčaści ZAT "Aŭhust-Bieł" Dźmitryj Siłajeŭ ŭ časie pres-turu 27 vieraśnia pryznaŭ najaŭnaść niekatorych parušeńniaŭ ekałahičnaj abstanoŭki ŭ suviazi z zapuskam novaha pradpryjemstva ŭ pasiołku Družny (Puchavicki rajon, Minskaja vobłaść). Adnak pry hetym dadaŭ, što adpaviednyja orhany kantrolu nazvali ich niaznačnymi.
Nahadajem, u 2008 hodzie žychary pasiołka Družny aktyŭna pratestavali suprać budaŭnictva zavoda pa vytvorčaści piestycydaŭ kampanijaj "Aŭhust-Bieł". U Administracyju prezidenta i ŭrad Biełarusi byli nakiravanyja tysiačy podpisaŭ suprać budaŭnictva ŭ rehijonie hetaha pradpryjemstva.
"Isnuje takoje paniaćcie, jak prezumpcyja vinavataści pryrodakarystalnikam, - tłumačyć Źmicier Siłajeŭ. - Pradpryjemstva pavinna dakazać i hramadskaści, i dziaržaŭnym orhanam, što nie škodzić navakolnamu asiarodździu".
Pa słovach pradstaŭnika zavodu, heta i było zroblena. U łabaratoryi pradpryjemstva i ŭ Respublikanskim navukova-praktyčnym centry hihijeny Biełarusi rehularna pravodziacca śpiecyjalnyja zamiery, jakija paćviardžajuć, što dziejnaść ZAT "Aŭhust-Bieł" nie nanosić škodu ekałohii, adznačyŭ Dźmitryj Siłajeŭ.
"Było parušeńnie paŭtara hoda tamu. My pačali vypusk novych preparataŭ, choć heta byli prosta sprobnyja partyi na dziaržaŭnaj rehistracyi, jakija byli nie ŭklučanyja ŭ pieršapačatkovy prajekt. Heta značyć,
my adnačasova zapuścili ŭ vytvorčaść i zdali prajekt na ekśpiertyzu.Hetaje parušeńnie, adpaviedny štraf my atrymali. Heta značyć kantrol za nami vielmi surjozny ", - raspaviadaje namieśnik kiraŭnika pradpryjemstva.
U chodzie pres-tura pa pradpryjemstvu Dźmitryj Siłajeŭ padkreśliŭ, što ŭsie ekałahičnyja sprečki zastalisia ŭ minułym. Navat z susiednimi zavodami - byłymi praciŭnikami dziejnaści pradpryjemstva - adnosiny naładžany. "Samaja apošniaja pretenzija - debaty na forumach u internecie - tak i datujucca 2009 hodam. Zaraz pretenzij, demanstracyj, mitynhaŭ, artykułaŭ u hazietach admoŭnych niama", - dadaŭ namieśnik dyrektara pradpryjemstva.
