U Atłantycy znojdzienyja abłomki karabla, u jakim było 200 ton srebra koštam 150 młn funtaŭ. Heta najvialikšaja znachodka kaštoŭnych mietałaŭ u mory.
Srebra znojdzienaje na borcie brytanskaha transpartnaha karabla, jaki byŭ zatopleny niamieckaj padvodnaj łodkaj u 1941 hodzie.
Znajšła hetyja skarby amierykanskaja daśledčaja kampanija Odyssey Marine. Jana pakinie sabie 80% znachodki — pavodle damovy z departamientam transpartu.
U 1941 hodzie karabiel SS Gairsoppa nakiroŭvaŭsia ź Indyi ŭ Brytaniju, adnak pa darozie na sudnie skončyłasia paliva i pačaŭsia štorm. Karabiel sprabavaŭ spynicca ŭ havani, adnak jaho zaŭvažyŭ ekipaž niamieckaj padvodnaj łodki.
Paśla tarpiednaj ataki z 85 členaŭ ekipaža vyžyli try čałavieki. Jany sprabavali dapłyści da bieraha na vyratavalnaj šlupcy, adnak dvoje ź ich zahinuli pa darozie da bieraha.
Abłomki karabla znajšli hetym letam u paŭnočnaj Atłantycy
na hłybini 4700 mietraŭ, amal za 500 kiłamietraŭ ad bierahoŭ Irłandyi.Adnak tolki na hetym tydni pastupiła infarmacyja, što hetyja abłomki naležać karablu SS Gairsoppa.
«My vyśvietlili raźmiaščeńnie abłomkaŭ i toje, što heta za karabiel. Uličvajučy miescaznachodžańnie i stan karabla, my ŭpeŭnienyja, što zapłanavanyja nami nastupnyja zachady buduć paśpiachovymi, i my zmožam atrymać hety hruz srebra», — kaža Endru Krejh, menedžar prajekta kampanii Odyssey Marine.
SS Gairsoppa lažyć prosta na marskim dnie z adkrytymi hruzavymi trumami. Heta aznačaje, što źlitki možna budzie atrymać dziakujučy robatam, jakija pracujuć na dystancyjnym kiravańni.
Ekśpierty kažuć, što pareštki ludziej znajści małavierahodna, uličvajučy daŭnaść karablekrušeńnia i hłybiniu, na jakoj znachodzilisia abłomki sudna.
