U druhoj pałovie dnia 23 vieraśnia ŭ sudzie byli prahledžany kadry z kamier videanazirańnia na stancyjach mietro «Kastryčnickaja» i «Kupałaŭskaja» i na vulicach u centry horada, na jakich prysutničaje hałoŭny padazrony ŭ terakcie Dźmitryj Kanavałaŭ.
Na videa vidać, jak Kanavałaŭ spuskajecca ź leśvicy ź pierachodu stancyi «Kupałaŭskaj " na stancyju «Kastryčnickaja» z adstaŭlenaj u bok rukoj, što śviedčyć pra ciažar sumki. Z tunela pamiž stancyjami jon idzie naleva. Praź niekatory čas, pastaviŭšy sumku poruč z łaŭkaj, Kanavałaŭ sadzicca na łaŭku. Zatym pakidaje torbu i źmiešvajecca z natoŭpam. Jon padnimajecca pa prystupkach da tunela na «Kupałaŭskuju» (płatforma na «Kastryčnickaj» zapoŭniena ludźmi) i niekatory čas staić u vyznačanym raniej dla siabie biaśpiečnym miescy, trymajučy ruki ŭ kišeniach kurtki.
Vybuch adbyvajecca ŭ 17.56. U sudzie byŭ pakazany momant vybuchu z vaśmi kamier, ustanoŭlenych na «Kastryčnickaj», u tuneli na «Kupałaŭskuju», eskałatarach, chołach. U roznych rakursach bačna ŭspyška, mocnaje zadymleńnie, ludzi, jakija biahuć ad miesca vybuchu. U zale suda paciarpiełyja hladzieli hetyja kadry ŭ poŭnym maŭčańni.
Vychodziŭ Kanavałaŭ ź mietro cieraz stancyju «Kupałaŭskuju», što na druhoj linii. Kamiery zafiksavali jaho na płatformie, na eskałatary, u chole stancyi. Na pavierchniu Kanavałaŭ vyjšaŭ kala budynka Administracyi prezidenta, minuŭ jaho, spuściŭsia da cyrka, pierajšoŭ na druhi bok praśpiekta Niezaležnaści, padniaŭsia da Kastryčnickaj płoščy i, prajšoŭšy cieraź jaje mima Pałaca Respubliki, nakiravaŭsia ŭ bok haradskoj ratušy na płoščy Svabody. Na apošnich kadrach, pakazanych u sudzie, Kanavałaŭ idzie mima ratušy.
Paśla prahladu videa dziaržabvinavaŭcy zapytali ŭ Kavalova, ci paznaŭ jon na videakadrach siabie razam z Kanavałavym 10 krasavika i Kanavałava 11 krasavika. Abvinavačany adkazaŭ śćviardžalna, pry hetym adznačyŭ, što paznaŭ tolki na tych kadrach, dzie vidarys vyrazny.
