Prezident UEFA Mišel Płacini vystupiŭ z prapanovaj źmianić farmat praviadzieńnia adboračnaha turniru čempijanatu Jeŭropy-2016 pa futbole, u finale jakoha ŭ Francyi buduć udzielničać 24 zbornyja.
Na pasiadžeńni vykankama UEFA na Kipry jon prapanavaŭ padzialić adboračny turnir na dva etapy. Na pieršym ź ich 52 zbornyja buduć raśsiejanyja pa 13 hrupach.
Čatyry kamandy ŭ kožnaj hrupie za hod praviaduć turnir.Zbornyja, jakija zojmuć pieršyja miescy ŭ svaich kvartetach, atrymajuć pucioŭki ŭ finalny raŭnd.
Na dumku Płacini, najmacniejšyja kamandy Staroha Śvietu pry takoj formule buduć vyzvalenyja ad šmatlikich sustreč z horšymi ŭ kłasie kamandami.
Padčas druhoha hoda adboračnaha cykłu top-zbornyja praviaduć vystavačny turnir, jaki pavinien prynieści UEFA salidny prybytak.
A rešta kamandaŭ budzie znoŭ raźmierkavanaja pa adboračnych hrupach, u jakich buduć razyhrany jašče 10 puciovak u finalnuju stadyju Eŭra-2016.
Čempijanat Jeŭropy-2016 stanie pieršym, u jakim kolkaść udzielnikaŭ składzie 24 kamandy. Da 1992 hoda finalistaŭ było vosiem, a z 1996 h. ich skład pašyryŭsia da 16-ci. Na Jeŭra-2012 u Polščy i Ukrainie taksama vystupiać 16 zbornych.
Francyja ŭžo vyznačyłasia z haradami, jakija prymuć čempijanat Jeŭropy. U śpis uvajšli Bardo, Łans, Lil, Marsel, Nansi, Nica, Paryž i Lijon.
