Juryja Linhu, jaki raskazaŭ ab źbivańniach u kałonii, pasprabavali abvinavacić u kradziažy 3

Juryja Linhu, jak raskazaŭ ab źbivańniach u hłybockaj kałonii (Viciebskaja vobłaść), pasprabavali abvinavacić u kradziažy. Pra heta BiełaPAN paviedamiŭ dyrektar infarmacyjna-aśvietnaj ustanovy «Płatforma» Andrej Bandarenka.

Pavodle jaho słoŭ, viečaram 6 vieraśnia supracoŭniki milicyi zatrymali Linhu, jaki žyvie ŭ Smarhoni (Hrodzienskaja vobłaść), z patrabavańniem pryznacca ŭ kradziažy hrošaj.

Juryju nie dali mahčymaści źviazacca z advakatam i pradstaŭnikami «Płatformy». «Noč jon pravioŭ u Smarhonskim RAUS i tolki ranicaj 7 vieraśnia, a 10-j hadzinie, zmoh patelefanavać mnie, kali jaho pryvieźli ŭ RAUS na razhlad administracyjnaha pravaparušeńnia. Jakoje pravaparušeńnie jamu inkryminujecca, pakul niezrazumieła», — paviedamiŭ Bandarenka.

«Pakul składana štości kamientavać, my tolki ranicaj daviedalisia ab zdareńni i zaraz źviazvajemsia z advakatam Juryja. Uspaminajučy pahrozy kiraŭnictva Smarhonskaha RAUS ab tym, što kali Linha nie admovicca ad svaich słoŭ ab katavańniach u hłybockaj kałonii, to na jaho „paviesiać“ usie kradziažy rajony, moža mierkavać, što abiacańni pačali zbyvacca. Nie majučy inšaj mahčymaści ŭździejničać na Linhu, milicejskija čyny pačali banalnaje źviadzieńnie rachunkaŭ. Im vielmi nieabchodna pakazać usim astatnim, što budzie, kali jany vyrašać zmahacca za praŭdu i spraviadlivaść», — ličyć Bandarenka.

Jak padkreśliŭ kiraŭnik «Płatformy», Juryj Linha — «mocny čałaviek». «Za niekalki dzion da hetaha incydentu ŭ razmovie sa mnoj jon skazaŭ, što na vulicy jaho sustrakajuć nieznajomyja ludzi, paciskajuć jamu ruku i kažuć, što hanaracca im», — adznačyŭ Bandarenka.

1 žniŭnia ŭ Minsku prajšła pres-kanfierencyja, arhanizavanaja infarmacyjna-aśvietnaj ustanovaj «Płatforma». Adzin ź jaje ŭdzielnikaŭ, Juryj Linha, jaki niadaŭna vyzvaliŭsia z hłybockaj kałonii, raskazaŭ ab faktach źbivańnia źniavolenych u hetaj kałonii. Pavodle jaho słoŭ, u červieni hetaha hoda źniavolenyja zapatrabavali sustrečy z hienprakuroram Biełarusi ŭ suviazi z drennymi ŭmovami ŭtrymańnia ŭ kałonii. Pakolki sustreča nie adbyłasia, niekatoryja jaje inicyjatary abjavili haładoŭku, paśla čaho byli žorstka źbityja. Adzin ź ich paśla hetaha ŭsparoŭ sabie žyvot, druhi — vieny i ledź nie pamior ad straty kryvi. Maci źniavolenych infarmacyju ab źbivańniach u kałonii paćvierdzili.

Paśla viartańnia ŭ Smarhoń u Linhi pačalisia prablemy ź milicyjaj. Pavodle słoŭ Bandarenki, jamu nieadnarazova pahražali, «až da aryštu», i papiaredžvali, što ab pravach źniavolenych jon budzie raskazvać u kałonii.

U MUS infarmacyju ab źbivańniach, haładoŭcy i sprobach suicydu ŭ kałonii Hłybokaha nie paćvierdzili. U Hienprakuratury zajavili pra namier vyvučyć situacyju.

Siarhiej Pulša, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH