U Siańnie adkryli pomnik u honar samaj bujnoj tankavaj bitvy Druhoj suśvietnaj (nie Kurskaja) 16

U rajonnym centry Sianno Viciebskaj vobłaści 6 vieraśnia adbyłosia ŭračystaje adkryćcio pomnika ŭ honar samaj bujnoj tankavaj bitvy Druhoj suśvietnaj vajny.

Manumient ujaŭlaje saboj saviecki tank IS-3, ustanoŭleny na pastamiencie z nadpisam: «Tank IS-3 ustanoŭleny ŭ honar podźvihu savieckich tankistaŭ u hady Vialikaj Ajčynnaj vajny i ŭ pamiać ab voinach 5-ha i 7-ha miechanizavanych karpusoŭ 20-j armii Zachodniaha frontu, jakija ŭziali ŭdzieł u tankavaj bitvie pad Siannom 6–10 lipienia 1941 hoda».

Bajavuju mašynu rajcentru pieradało Ministerstva abarony Biełarusi. U rytuale pieradačy tanka miascovym uładam uziali ŭdzieł ministr abarony Biełarusi Juryj Žadobin, staršynia Viciebskaha abłasnoha savieta deputataŭ Alaksandr Aciasaŭ, staršynia Sieńnienskaha rajvykankama Viktar Capota, vieterany vajny, pradstaŭniki pracoŭnych kalektyvaŭ horada. Da pomnika-tanka byli ŭskładzieny vianki i kvietki.

Źviartajučysia da ŭdzielnikaŭ mitynhu, Juryj Žadobin skazaŭ:

«Siońnia, na žal, mała chto viedaje ab bujnoj tankavaj bitvie Druhoj suśvietnaj vajny, jakaja adbyłasia tut 70 hadoŭ tamu.

6 lipienia 1941 hoda ŭ žorstkim kryvavym bai syšlisia nie na žyćcio, a na śmierć bolš čym 2 tysiačy bajavych mašyn Čyrvonaj Armii i niamieckaha viermachta. Heta było bolš, čym u paźniej u słavutaj Procharaŭskaj bitvie na Kurskaj duzie».

Jak ličyć kiraŭnik Minabarony, «hetyja hieraičnyja i adnačasova trahičnyja staronki historyi Čyrvonaj Armii, na žal, niezasłužana zabyty letapiscami Vialikaj Ajčynnaj vajny». «Ale mienavita na biełaruskaj ziamli ŭ pačatku vajny byli zakładzieny asnovy pieramohi, značny ŭniosak u jakuju zrabili i voiny, jakija bilisia pad vašym horadam. Na praciahu čatyroch sutak, viedučy nastupalnyja i abarončyja bai, jany sarvali płany prasoŭvańnia praciŭnika na liniju abarony, jakaja farmiravałasia pa Zachodniaj Dźvinie i Dniapru. Heta vymušany byŭ pryznać i sam Hiejnc Huderyjan, jaki ŭ svaich miemuarach napisaŭ: «Nas mocna bili pad Siannom».

Ministr abarony taksama źviarnuŭ uvahu na simvaličnaść daty adkryćcia pomnika — 66 hadoŭ tamu, 7 vieraśnia 1945 hoda, tank IS-3, jaki nie paśpieŭ uziać udzieł u Vialikaj Ajčynnaj vajnie, ale ličyŭsia hordaściu savieckich tankabudaŭnikoŭ, byŭ upieršyniu pakazy suśvietnaj hramadskaści na paradzie sajuznych vojskaŭ u Bierlinie. Adkryćcio pomnika adbyłosia napiaredadni śviatkavańnia Dnia tankista, jaki štohod adznačajecca ŭ druhuju niadzielu vieraśnia.

* * *

Niekatoryja historyki nazyvajuć tankavuju bitvu pad Siannom nie tolki samaj bujnoj u chodzie Vialikaj Ajčynnaj i Druhoj suśvietnaj vojnaŭ, ale i ŭsich vojnaŭ XX stahodździa. U šaścitomnaj historyi Vialikaj Ajčynnaj vajny Savieckaha Sajuza 1941–1945 hadoŭ paviedamlajecca, što 6 lipienia 1941 hoda vojski 20-j armii, jakoj kamandavaŭ hienierał-lejtenant Pavieł Kuračkin, nanieśli kontrudar z rajona Oršy pa vojskach 3-j tankavaj hrupy niemcaŭ. U kontrudary ŭdzielničali 5-ty i 7-my tankavyja karpusy, jakija mieli kala tysiačy tankaŭ. Prykładna stolki ž mašyn mieła i 3-ja tankavaja hrupa praciŭnika. Savieckija miechanizavanyja korpusy nanieśli vorahu vialikija straty i adkinuli jaho na 30–40 km u bok Lepiela. Pry hetym, jak paviedamlaje Vialikaja savieckaja encykłapiedyja, u bitvie pad Procharaŭkaj, jakaja aficyjna ličycca adnoj z najbujniejšych u vajennaj historyi bitvaj z prymianieńniem braniatankavych sił, udzielničała kala 1500 tankaŭ: prykładna 800 z savieckaha boku i 700 — ź niamieckaha.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH