U Biełarusi padrychtavany prajekt ukaza ab vydzialeńni ziamielnych učastkaŭ dla majučych patrebu pad indyvidualnaje budaŭnictva, paviedamiŭ namieśnik premjer-ministra Anatol Kalinin.
Zhodna z prajektam dakumienta, jaki atrymaŭ ziamielny ŭčastak nie zmoža pradać jaho na praciahu doŭhaha pieryjadu. Tak, uładalnik ŭčastka pavinien pastavić na im karobku, vokny, nakryć dacham, tolki paśla hetaha praz 8 hadoŭ jon atrymaje prava realizavać jaho. Heta, na dumku vice-premjera, dazvolić adpudzić śpiekulantaŭ, jakija jość u hetym biznesie.
Kalinin paviedamiŭ, što na budaŭnictva doma na ŭčastku budzie adviedziena 5 hadoŭ.
Dalej pa ŭvažlivaj pryčynie hety termin moža być pradoŭžany jašče na 3 hady pa ŭzhadnieńni ź miascovymi orhanami. Zatym pry nieabchodnaści ŭładalnik ŭčastka moža zakansiervavać budaŭnictva jašče na 2 hady. "Takim čynam, va ŭładalnika ŭčastka jość 10 hadoŭ na budaŭnictva chaty, i tolki potym praz 8 hadoŭ jon budzie mieć prava jaho pradać", - padkreśliŭ namieśnik premjer-ministra.
Pavodle jaho słoŭ, siońnia ŭ čarzie majučych patrebu znachodziacca 50 tys. čałaviek i dziaržava hatova prapanavać im 65 tys. učastkaŭ. Adnak usie chočuć atrymać ŭčastki abo ŭ Minskim rajonie, abo ŭ pryharadach abłasnych centraŭ. Vice-premjer padkreśliŭ, što choć u Minskim rajonie i jość prablema z ŭčastkami, u samoj vobłaści svabodnych terytoryj zvyšdastatkova.
