Valutnaja vyručka Biełkaapsajuza ad ekspartu čarnic skłała 5,4 młn. dołaraŭ. Pra heta paviedamiła načalnik upraŭleńnia narychtovak Biełaruskaha respublikanskaha sajuza spažyvieckich tavarystvaŭ Aksana Skindar.
Pavodle jaje słoŭ,
ekspartnaja cana čarnic raście. Kali ŭ pačatku pastaŭki jahada kaštavała 3 jeŭra za kiłahram, to ŭ dalejšym čakajecca rost cen da 3,9–4 jeŭra za kiłahram.
Skindar paviedamiła, što dola biełaruskaj jahady na jeŭrapiejskim rynku składaje 30%. Pry hetym, pavodle jaje mierkavańnia, jakaść čarnic ź Biełarusi značna vyšejšaja, čym amierykanskaj kultyvavanaj.
Načalnik upraŭleńnia adznačyła, što kali piać hadoŭ tamu biełaruskaja jahada pierakuplałasia ŭ krainy Bałtyi, a adtul pastaŭlałasia ŭ inšyja krainy Jeŭropy, to zaraz Biełkaapsajuz ustanaŭlivaje pramyja suviazi z zachodnimi spažyŭcami. Palapšajecca kłasnaść jahady, jaje tavarny vyhlad. Sioleta było pryniata rašeńnie adhružać nie syravinu, a tolki jahadu ŭ zamarožanym vyhladzie. «Heta daje nam mahčymaść zarabić bolš hrošaj, bolš valuty i pavialičyć kankurentazdolnaść i značnaść našaj jahady na mižnarodnym rynku», — adznačyła jana.
Čarnicy pastaŭlajucca nie tolki ŭ jeŭrapiejskija krainy, ale i z 2009 hoda ŭ Kitaj. Sioleta Biełaruś naviedaŭ dyrektar kitajskaj farmaceŭtyčnaj kampanii, jakaja zakuplaje syravinu ŭ Biełarusi. Pavodle słoŭ Skindar, jon vysoka acaniŭ jakaść biełaruskaj jahady.
U cełym, pavodle słoŭ śpiecyjalista, sioleta ŭ nasielnictva było zakuplena 3,6 tys. ton čarnic. Za ich zdaču było vypłačana 60 młrd. rubloŭ. Čarnicy zakuplalisia pa canie ad 10 tys. za kiłahram u pačatku siezona narychtovak da 26–26,8 tys. — u kancy. Pry hetym jana adznačyła, što Biełkaapsajuz nie źjaŭlajecca manapalistam u śfiery zakupak dzikarosłaj jahady. «My zakuplajem pradukcyju ŭ davoli žorstkaj kankurencyi», — adznačyła jana.
«Sioleta my vybrali dla siabie takuju pazicyju, pavodle jakoj pieršymi ŭstanavili dla siabie davoli vysokuju zakupnuju canu. Pry hetym ceny sioleta dynamična źmianialisia. Takaja pazicyja apraŭdana, bo čarnicy znachodziać svajho pakupnika i z kožnym hodam heta zapatrabavanaść i zacikaŭlenaść uzrastaje», — padkreśliła Skindar.
