72 stravy vyklučna biełaruskaj nacyjanalnaj kuchni prapanuje novy restaran «Biełaruskaja chata», jaki aficyjna adkryŭsia siońnia ŭ Maskvie na vulicy Pakroŭka za niekalkich sotniaŭ mietraŭ ad pasolstva Biełarusi ŭ Rasii,pieradaje karespandent BiełTA.
«Naša asnoŭnaja ideja — dakładnaje zachavańnie tradycyjaŭ biełaruskaj kuchni, my nie źbirajemsia padładžvacca ni pad maskoŭskuju publiku ŭ cełym, ni pad asobnych naviednikaŭ, — raskazaŭ adzin z zasnavalnikaŭ ustanovy Marat Novikaŭ. — My chočam na realnym prykładzie pakazać jadnańnie narodaŭ Biełarusi i Rasii, bo našym klijentami źjaŭlajucca ŭ asnoŭnym maskvičy, jakija mohuć adčuć tut ciepłyniu biełaruskaha naroda».
Restaran raźličany na spažyŭca sa siarednim dastatkam, choć ježa ŭ im hatujecca niezvyčajna smačnaja, navat pa maskoŭskich mierkach. U kancepcyju ŭstanovy ŭvachodzić poŭnaja zabarona na kureńnie. Pryčym jana raspaŭsiudžvajecca na ŭsich: vyklučeńnia nie było zroblena navat dla ministraŭ i inšych aficyjnych asobaŭ, jakija ŭziali ŭdzieł va ŭračystym adkryćci restarana. Jašče adna asablivaść — 85% absłuhovaha piersanału — hramadzianie Biełarusi.
Kožnuju subotu ŭ «Biełaruskaj chacie» buduć vystupać falkłornyja kalektyvy. Płanujuć adznačać tut i biełaruskija dziaržaŭnyja i nacyjanalnyja śviaty, dla jakich zadumana rychtavać śpiecyjalnyja prahramy i raspracoŭvać aryhinalnaje mieniu.
Zasnavalnikami novaha biełaruskaha restarana stali viadomyja kandytarskija pradpryjemstvy Biełarusi «Spartak», «Kamunarka» i «Słodyč». «Biełaruskaja chata» stała čaćviortaj biełaruskaj ustanovaj hramadskaha charčavańnia ŭ Maskvie.
