Trahiedyja adbyłasia ŭ adnoj z małasiamiejek u Paŭnočnym mikrarajonie ŭviečary 10 žniŭnia.
Źbitaja žančyna, jakuju syn vyšturchaŭ z pakoja, niekalki hadzin pralažała na padłozie ŭ ahulnym kalidory małasiamiejki, ale nichto z susiedziaŭ nie vyklikaŭ miedykaŭ. Ad atrymanych traŭmaŭ haradžanka pamierła.
Jak paviedamiŭ prakuror h. Baranavičy Alaksiej Bildziejka, cieła 46-hadovaj žančyny kala čatyroch ranicy 11 žniŭnia ŭ kalidory doma vyjaviŭ susied.
Pavodle papiaredniaj infarmacyi, viečaram 10 žniŭnia pamiž zahinułaj i jaje 26-hadovym synam paśla sumiesnaha raśpivańnia śpirtnych napojaŭ uspychnuła svarka. Mužčyna staŭ źbivać maci. Pa słovach prakurora, syn nanios maci šmatlikija ŭdary pa hałavie i tułavie, paśla čaho vykinuŭ jaje ŭ kalidor, dzie praź niekalki hadzin žančyna pamierła.
«Haradžanka praciahły čas pralažała na padłozie. I ja dumaju, što ludzi chadzili, bačyli — kalidor u domie vialiki, kvater šmat — ale čamuści nichto nie dapamoh žančynie, nie paviedamiŭ ab tym, što zdaryłasia. Jak takoje mahło adbycca? Čamu ludzi nastolki abyjakava pastavilisia da čužoj biady? Nie razumieju», — ździŭlajecca Alaksiej Bildziejka.
Pa dadzienych prakurora, mužčyna pracavaŭ hruzčykam, raniej pryciahvaŭsia da administracyjnaj adkaznaści za parušeńnie hramadskaha paradku ŭ pjanym vyhladzie, a taksama byŭ sudzimy za pahrozu zabojstva. Haradžanin zatrymany i źmieščany ŭ izalatar časovaha ŭtrymańnia. U dačynieńni da jaho 11 žniŭnia prakuraturaj raspačata sprava pa p. 6 č. 2 art. 139 KK (zabojstva, učynienaje z asablivaj žorstkaściu).
