Čatyrom amataram hołaha špacyru pa centralnych vulicach pahražaje da 6 hadoŭ turmy.
Čaćviora mužčyn, jakija pražyvajuć u Paŭnočnym mikrarajonie Baranavičaŭ, znachodziačysia ŭ stanie ałkaholnaha apjanieńnia, dniom 4 žniŭnia ŭ poŭnym niehliže prajšlisia ad Śviaciłaŭskaha voziera da Ladovaha pałaca. Ich adzieńnie nieśli dźvie žančyny.
«Minaki, jakija stali śviedkami hetaha “paradu nudystaŭ”, patelefanavali ŭ milicyju, i parušalniki paradku byli zatrymanyja supracoŭnikami departamienta achovy», — paviedamiła pres-sakratar Baranavickaha HAUS Natalla Siadzielnik. Pavodle jaje słoŭ, usie zatrymanyja raniej byli sudzimyja, niekatoryja —nieadnarazova. Uzrost «nudystaŭ» — ad 23 da 38 hadoŭ.
«Spačatku mužčyny rastłumačyli, što raspranulisia, nibyta vykonvajučy ŭmovy sprečki. Paźniej stali adniekvacca ad hetaha i spasłalisia na toje, što byli pjanyja i, nibyta, nie pamiatajuć, što prymusiła ich vyjści na vulicu biez adziežy», — raspaviała Natalla Siadzielnik.
U dačynieńni da haradžan 10 žniŭnia Baranavickim HAUS raspačata kryminalnaja sprava pa č. 2 art. 339 KK RB (chulihanstva), zhodna ź jakoj im moža pahražać da 6 hadoŭ pazbaŭleńnia voli.