Kiraŭnictva Horackaj papraŭčaj kalonii №9 zajaŭlaje, što sa źniavolenym Źmitrom Daškievičam «usio ŭ paradku». Pra heta havorycca ŭ listach aktyvistam, jakija 2 žniŭnia patrabavali ad kiraŭnictva turmy dazvołu na sustreču advakata sa źniavolenym.
Pad zvarotam da kiraŭnictva turmy padpisalisia bolš za sorak čałaviek. Jon byŭ napisany paśla taho jak advakatu admovili ŭ sustrečy sa źniavolenym maładafrontaŭcam. Aktyvisty źvinavacili administracyju kalonii ŭ parušeńni zakanadaŭstva, vykazali zaściarohu, što z Daškievičam u turmie adbyvajecca niešta niadobraje. Adkaznaść za biezzakońnie padpisanty zvarotu ŭskłali na kiraŭnictva turmy.
Adnymi ź pieršych atrymali adkazy za podpisam načalnika kalonii Alaksandra Kavalova siabry Kanservatyŭna-Chryścijanskaj partyi BNF z Horak Viktar i Maryja Karalkovy. U liście havorycca, što «ad asudžanaha Daškieviča nijakich zajavaŭ albo skarhaŭ nie pastupała. Stan zdaroŭja asudžanaha zadavalniajučy. Skarhaŭ na stan zdaroŭja nie pastupała».
«Heta zvyčajnaja adpiska. Kali nasamreč niama nijakich prablemaŭ, to možna było b dazvolić sustrecca advakatu sa Źmitrom. Heta adpiska, kab prademanstravać, što my dziejničajem pavodle zakonu. My žyviom u Horkach i šmat drennych čutak chodzić tut pra toje jak pavodziać siabie turemščyki z Daškievičam. Usio, što adbyłosia 2 žniŭnia kala kalonii – heta vynik pravakacyjnych dziejańniaŭ administracyi turmy. Ludzi chadzili da kiraŭnictva turmy. Ich tam nie vysłuchoŭvali, a zapisvali ich pašpartnyja źviestki dy zdymali na videa supracoŭniki KDB, jakija nijakaha dačynieńnia da turmy nia majuć. Toje, što ludzi pačali pratestavać kala budynka administracyi – heta byŭ emacyjny adkaz na pavodziny turemščykaŭ. Tvorać tajamnicu ź ničoha – voś i atrymali toje, čaho damahalisia – ludzkoha pratestu», - kamentuje adkaz z turmy Viktar Karalkoŭ.
Admovili advakatu ŭ sustrečy z Daškievičam na toj padstavie, što asudžany piśmova nie prasiŭ pra jaje. Aktyvisty paličyli taki adkaz nadumanym i arhanizavali pikiet z raściažkaj «Spynicie pieraśled» pierad administracyjnym budynkam kalonii. Akcyju pratestu razahnali. Piatnaccać jaje ŭdzielnikaŭ zatrymali.
Ciapier u izalatary časovaha ŭtrymańnia ŭ Horkach i Drybinie adbyvajuć pakarańnie dzieviać aktyvistaŭ. Čaćviora ź ich vyjduć na volu paśla dziesiaci sutak aryštu 12 žniŭnia.
Hładzi jašče: Arłoŭ napisaŭ načalnikam biełaruskich turmaŭ.
