Paśla zvarotu hramadskaści horada Baranavickaja haradskaja ŽKH pačała dobraŭparadkavać terytoryju vakoł pomnika
Zvarot z prośbaj prybrać terytoryju, ustalavać łavy dla adpačynku i turnikietnuju aharodžu kala «Kryža Achviaram hvałtu 1939—1953 hh» padpisali 104 žychary horada. U adkazie na zvarot hienieralny dyrektar kamunalnaj haspadarki horada Ryhor Kasabucki paviedamiŭ, što da 15 žniŭnia UKRBP «Baranavičyrambud» vykanaje ramont asfaltabietonnych darožak i ŭstaluje mietaličnyja zahłuški na papiaročnaj trubie Kryža.
KUPP «Kvietki» ŭžo vykanała rekanstrukcyju kłumby, pasadziła kvietki i padrezała šaty drevaŭ kala pomnika, a taksama zrabiła farmovačnuju abrezku kustoŭ u skviery.
U toj samy čas ŽKH ličyć niemetazhodnym ustalavańnie łavaŭ dla adpačynku, bo «na ŭstanoŭlenych łaŭkach u viečarovy i načny čas buduć źbiracca kampanii, parušać hramadski paradak i pakoj hramadzianaŭ». U adkazie taksama adznačana, što rabić turnikietnuju aharodžu Kryža niama nieabchodnaści — u hetym miescy niama intensiŭnaha ruchu, a kvietnik aharodžany pastaŭlenaj na rabro sianažnaj plitkaj.
Viktar Syryca, jaki źbiraŭ podpisy i padavaŭ zajavu, vielmi ŭdziačny kamunalnym słužbam horadu za pracu. «Dziakuj Bohu, što ŭsio tak dobra vyrašyłasia», — padsumavaŭ jon u razmovie z «IR».
Hladzi jašče: Historyja źjaŭleńnia kryža «Achviaram hvałtu 1939-1953 hadoŭ»
