Były źniavoleny kałonii № 13 u horadzie Hłybokaje (Viciebskaja vobłaść) Juryj Linha i maci dvuch źniavolenych, jakija znachodziacca tam, na sustrečy z žurnalistami 1 žniŭnia ŭ Minsku raskazali pra źbivańni ŭ hetaj papraŭčaj ustanovie.
Jak paviedamiŭ Juryj Linha, sa źbivańniami jon sutyknuŭsia praktyčna adrazu paśla prybyćcia ŭ kałoniju ŭ žniŭni 2010 hoda. Jaho samoha źbili biez padstavy i doŭhi čas nie davali lekaŭ, niahledziačy na toje, što jany jamu žyćciova nieabchodnyja paśla apieracyi pa vydaleńni ščytapadobnaj załozy.
Linha zaznačyŭ, što ŭ červieni hetaha hoda źniavolenyja zapatrabavali sustrečy z hienprakuroram Biełarusi ŭ suviazi z drennymi ŭmovami ŭtrymańnia ŭ kałonii. Sustreča nie adbyłasia, a niekalki jaje inicyjataraŭ byli źbityja. U pryvatnaści, byŭ źbity źniavoleny Mikałaj Razujeŭ, jaki paśla hetaha razrezaŭ sabie žyvot. Źbityja taksama byli Juryj Kanciava, źniavoleny pa mianušcy Čykin (jaho proźvišča Linha nie viedaje) i małady čałaviek pa imieni Ilja. Apošni, jak śćviardžaje Juryj Linha, ledź nie pamior ad straty kryvi.
Pra źbivańni ŭ hłybockaj kałonii žurnalistam taksama zajavili maci źniavolenych — 18 hadovaha Ilji Kaviernikava, asudžanaha za kradziež mašyny, i Usievałada Siarhiejeva.
Śviatłana Pakunova, maci Kaviernikava, raskazała, što niadaŭna była na spatkańni z synam. Jaho pryviali na sustreču sa štrafnoha izalatara (ŠIZA), u jakim toj znachodzicca z 12 lipienia ŭ suviazi z abviaščeńniem haładoŭki pratestu.
Pavodle słoŭ žančyny, u jaje syna byli apuchłyja ruki, na adnoj ź ich — ślady ad parezaŭ.Źniavoleny paprasiŭ maci źviarnucca ź infarmacyjaj pra źbivańni ŭ kałonii «kudy zaŭhodna, bo horš užo nie budzie».
Ad syna Śviatłana Pakunova taksama daviedałasia, što paśla źbivańnia źniavolenych ich trymajuć u ŠIZA datul,
pakul nie źniknuć ślady źbivańnia.
Halina Siarhiejeva raskazała, što pra źbivańnie syna daviedałasia ad adnaho z byłych źniavolenych, jaki vyzvaliŭsia. Jana chacieła sustrecca z synam. Joj abiacali arhanizavać karotkaterminovaje spatkańnie praz try dni, adnak zatym datelefanavacca da administracyi kałonii nie atrymałasia.
Nahadajem, na minułym tydni MUS abvierhła infarmacyju pra sproby suicydu źniavolenych u hłybockaj kałonii № 13, vyklikanych pratestam suprać žorstkaha abychodžańnia.
U ministerstvie paviedamili, što 14 červienia adbyŭsia incydent z dvuma źniavolenymi, «schilnymi da pryhniotu śpieckantynhientu i paboraŭ». «Za nieadnarazovyja złosnyja parušeńni režymu ŭtrymańnia jany byli ŭ čarhovy raz adpraŭlenyja ŭ pamiaškańnie kamiernaha typu (PKT). Adzin sa źniavolenych, pa proźviščy Čakanaŭ, pry hetym nanios sabie rany na pieradpleččy lazom adnarazovaha stanka. Druhi, pa proźviščy Razujeŭ, užo znachodziačysia ŭ PKT, admoviŭsia prajści ŭ pakoj vobysku, akazaŭ supraciŭleńnie vajskovamu naradu, zaklikaŭ sukamiernikaŭ uziać ź jaho prykład. U suviazi z hetym da jaho była prymienienaja fizičnaja siła», — paviedamili BiełaPAN u MUS.
Zatym, jak patrabuje instrukcyja, byŭ praviedzieny miedycynski ahlad hetaha čałavieka, padkreślili ŭ MUS. Vyśvietliłasia, što ŭ mieddapamozie jon nie maje patreby. Paśla ahladu ŭračom, užo ŭ kamiery časovaj izalacyi, Razujeŭ nanios sabie drapiny na žyvacie taksama lazom adnarazovaha stanka, dadali ŭ ministerstvie.
