U Biełarusi z 1 žniŭnia pavyšajucca pracoŭnyja i sacyjalnyja piensii.
Adpaviedny ŭkaz №327 "Ab pavyšeńni piensij i ŭniasieńni źmianieńniaŭ va Ukaz Prezidenta Respubliki Biełaruś ad 23 kastryčnika 2010 h. numar 544" 26 lipienia padpisaŭ Alaksandr Łukašenka.
Ukazam praduhledžana pravieści pieraraźlik pracoŭnych piensij u žniŭni i listapadzie 2011 hoda, a taksama pavysić pamiery sacyjalnych piensij.
Z 1 žniŭnia pieraraźlik pracoŭnych piensij budzie praviedzieny zychodziačy ź siaredniaj zarabotnaj płaty rabotnikaŭ za II kvartał 2011 hoda. U vyniku pieraraźliku
piensii pavialičacca ŭ siarednim na 13 pracentaŭ - z Br669 tys. da Br757 tys. [Ciapier pamier siaredniaj piensii budzie raŭniacca 151 dalaru pavodle kursa Nacbanka, i 120 dalaram pavodle kursa čornaha rynku -- NN].
Taksama z 1 žniŭnia pavialičacca pamiery sacyjalnych piensij: invalidam I hrupy (u tym liku invalidam ź dziacinstva) - z 85 pracentaŭ da 100 pracentaŭ biudžetu pražytačnaha minimumu (BPM); invalidam ź dziacinstva II hrupy - z 75 pracentaŭ da 95 pracentaŭ BPM; invalidam II hrupy, dzieciam pa pryčynie straty karmiciela na kožnaje dzicia - z 65 pracentaŭ da 85 pracentaŭ BPM; invalidam III hrupy (u tym liku invalidam ź dziacinstva) - z 55 pracentaŭ da 75 pracentaŭ BPM; dzieciam-invalidam va ŭzroście da 18 hadoŭ pry stupieni straty zdaroŭja: pieršaj - z 60 pracentaŭ da 80 pracentaŭ BPM, druhoj - z 65 pracentaŭ da 85 pracentaŭ BPM, treciaj - z 75 pracentaŭ da 95 pracentaŭ BPM, čaćviortaj - z 85 pracentaŭ da 110 pracentaŭ BPM.
Z 1 listapada 2011 hoda pieraraźlik pracoŭnych piensij budzie praviedzieny zychodziačy ź siaredniaj zarabotnaj płaty rabotnikaŭ za III kvartał hetaha hoda.
U vyniku pieraraźliku piensii pavialičacca ŭ siarednim na 7,9 pracenta - z Br757 tys. da Br817 tys.
Dadatkovyja raschody na vypłatu pracoŭnych i sacyjalnych piensij z 1 žniŭnia składuć Br220,6 młrd., a z 1 listapada - Br370,6 młrd. u miesiac.
U cełym dla realizacyi nazvanych mier spatrebicca Br1,4 trłn. Fond sacyjalnaj abarony nasielnictva Minpracy i sacabarony maje finansavyja srodki ŭ nieabchodnym abjomie.
