U filmie «Hary Poter i dary śmierci» hledačy paznali Łukašenku 34

Dziŭnyja paraleli z rečaisnaściu znajšli biełaruskija hledačy ŭ druhoj častcy filma «Hary Poter i dary śmierci», jaki idzie ŭ suśvietnym prakacie i minskich kinateatrach. Hałoŭny vorah hieroja nahadvaje im Alaksandra Łukašenku. U kinateatry «Kastryčnik» padčas pramovy Vołan-de-Morta hledačy śmiajalisia i plaskali.

— Hałoŭny vorah hieroja filma i ŭsiaho prahresiŭnaha čałaviectva ŭ hetaj sieryi dazvoliŭ sabie mnostva vializnych manałohaŭ pra ahulnuju palityčnuju situacyju, intryhi vorahaŭ i budučyniu stvaranaj im realnaści. Užo nie viedaju, chto staviŭ pierakład filma i zdahadaŭsia nadać hołasu Vołan-de-Morta sipaty i pavučalny ton, ale na druhoj chvilinie ja adčuŭ deža viu. Miarkujučy pa śmiaškach vakoł, nie tolki ja. Kali ž sami-viedajecie-chto skančaŭ čarhovuju pramovu, usia zała nie pa-dziciačamu viesialiłasia i plaskała. Tak-tak, plaskała nie ihry aktoraŭ, a niekamu inšamu, imia jakoha ŭ nas nie pryniata zhadvać daremna, — napisaŭ błohier leon_by u tekście «Ideałahičnaja dyviersija ŭ Kastryčniku».

— Sam prykładna toje ž i pisaŭ u svajoj žežešačcy, dumaŭ, paranoja ci nie. Vyjaviłasia, nie paranoja, — dałučajecca da mierkavańnia dobry-guzik.

Błohier lobosov adznačyŭ, što śmiajaŭsia na ŭsiu zału, kali admoŭny hieroj skazaŭ «Ja samy mahutny čaraŭnik». Muha_elka piša: «Siońnia ranicaj chadziła hladzieć hety film i skazała siabru: heta ž Łukašenka!»

Apalityčnyja hledačy, niezadavolenyja tym, što praź śmiech u zale atmaśfiera prahladu filma była «zabitaja», taksama pryznajuć: «Tak, praŭda, było padobna».

Inšyja internet-karystalniki ci to žartam, ci to ŭsurjoz adznačajuć: jany ździŭlenyja tym, što film jašče nie zabaronieny ŭ Biełarusi.

«Praz dzień-dva ludzi ŭ cyvilnym pačnuć zabirać chłopajuščych i myšaščych prosta z kinateatra», — žartujuć jany.

Adznačym, što hledačy nie ŭpieršyniu paznajuć palityčnych dziejačaŭ u filmach-fentezi. Da prykładu, rasijskija prychilniki kino paznali Uładzimira Pucina ŭ adnym z hierojaŭ karciny «Uładar parścionkaŭ».

Druhaja častka filma «Hary Poter i dary śmierci» raskazvaje pra finalnuju bitvu čaraŭnikoŭ Hary Potera i Vołan-de-Morta. U apisańni Vołan-de-Morta havorycca nastupnaje:

— Vołan-de-Mort žorstki z naradžeńnia. U jaho ŭ žyćci svaja spraviadlivaść — taja, jakuju jon robić. U ciažkaj situacyi jon zvyčajna pakazvaje siabie aściarožnym, kiemlivym i spakojnym strateham. Jon lidar, jaki zaŭsiody i ŭsiudy addaje pieravahu biezumoŭnamu padparadkavańniu. Luby, chto naśmielicca pierajści jamu darohu, paškaduje pra toje, što naradziŭsia na śviet. Pomślivaść — jaho druhaja natura.

Taksama Vołan-de-Mort paranaidalny, manijakalny i dazvalaje sabie zapalčyvaść u znosinach ź ludźmi. Časta hetyja jakaści jon demanstruje niby napakaz, prymušajučy ludziej trapiatać pierad imi.

Salidarnaść

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH