Na 22 lipienia pryznačanaja cyrymonija rośpisu Śviatłany Harachavik ź viaźniem «Voŭčych nor» Paŭłam Vinahradavym. I adrazu ž maładyja atrymlivajuć spatkańnie na 3 dni.Apošniaja pieraškoda dla «viasiella» pieraadolenaja — dakumienty ab ustupleńni ŭ siłu prysudu žanichu ŭžo pryjšli…
«Siońnia daviedałasia, što nam daduć doŭhaje spatkańnie adrazu paśla rośpisu, tak što ŭsio ŭ paradku, chutka budziem žanatyja. Raśpisvajemsia 22 lipienia», — raspaviała Śviatłana Harochavik.
Maładyja ludzi, vymušanyja zaklučać šlub u kałonii, nie mahli raśpisacca raniej pa adnoj pryčynie:
«Zahvazdki jak takoj nie było, my prosta chvalavalisia, što pastanova ab ustupleńni prysudu ŭ siłu nie paśpieje pryjści da 22 čysła. U hetym vypadku nam by nie dali doŭhaje spatkańnie, a jaki rośpis biez spatkańnia? A raz usio dajšło, to spatkańnie budzie — na 3 dni», — adznačyła Śviatłana.
Razam ź niaviestaj u kałoniju pajeduć baćki i śviedki — tolki im dazvolena prysutničać na cyrymonii.
Pavał Vinahradaŭ — aktyvist kampanii «Havary praŭdu». 11 studzienia 2011 chłopcu pradjaŭlena abvinavačvańnie pa čč.1 i 2 art. 293 KK. Kančatkovaje abvinavačvańnie — pa č. 2 art. 293 i art. 370 (ździek ź dziaržaŭnych simvałaŭ). Znachodziŭsia pad vartaj u SIZA № 1 na vuł. Vaładarskaha. Sudovy praces pačaŭsia 27 krasavika 2011 hoda ŭ sudzie Kastryčnickaha rajona Minska (sudździa Ała Bułaš). 5 maja asudžany pa č. 2 art. 293 KK da 4 hadoŭ pazbaŭleńnia voli ŭ kałonii ŭzmocnienaha režymu.
Z momantu zatrymańnia ŭ studzieni pa ciapierašni čas (siem miesiacaŭ užo prajšło) Śviatłana Harochavik na spatkańni z žanichom «była 5 razoŭ i prasiedzieła 5 dzion u sudzie».
14 lipienia dziaŭčyna atrymała apošni list ad kachanaha, datavany 9 lipienia. Listy ź Ivacevičaŭ u Minsk idzie zvyčajna 4–5 dzion. «Maje da jaho chutčej dachodziać», — adznačaje Śviatłana.
«Na zdaroŭje nie skardzicca, piša što ŭsiaho jamu chapaje, umovy narmalnyja, jon u pryncypie nikoli ni na što nie skardzicca. Pisaŭ, što zrazumieŭ u čym zaklučajecca pakarańnie: heta adnastajnaść i ŭśviedamleńnie taho, što za płotam — Žyćcio», — adznačaje niaviesta.
Pavał Vinahradaŭ adbyvaje čatyrochhadovy termin źniavoleńnia ŭ kałonii «Voŭčyja nory» (Ivacevičy Bresckaj vobłaści). Tam, u kałonii, dziekabryst Vinahradaŭ maje znosiny z «chulihanam» Eduardam Łobavym, bačyŭ dziekabrysta Kviatkieviča i anarchista Alaksandra Franckievič.
