Biełaruskija honščyki vyjduć na start rali «Kijeŭskaja Ruś»

Dzieviać biełaruskich ekipažaŭ vypravilisia va Ukrainu na rali «Kijeŭskaja Ruś», u miežach jakoha projdzie pieršy etap «Kubku Družby» — novaj mižnarodnaj sieryi, arhanizavanaj sumiesnymi namahańniami ralijnych kamitetaŭ Biełarusi, Rasii i Ukrainy.

Upieršyniu pra «Kubak Družby» zahavaryli ŭ kancy minułaha hoda: padčas listapadaŭskaha rali «Brasłaŭ» pamiž staršyniami ralijnych kamitetaŭ BAF, RAF i FAU była dasiahnutaja papiaredniaja damoŭlenaść ab stvareńni dadzienaj honačnaj sieryi. Kožnaja z krain-udzielnic pravodzić pa adnym etapie ŭ miežach svaich nacyjanalnych spabornictvaŭ. Tak, sieryja startuje 16–17 lipienia ŭ miežach ukrainskaha rali «Kijeŭskaja Ruś» (etap čempijanatu i kubku Ukrainy pa rali).

Prynaležnaść da krainy-ŭdzielnicy vyznačajecca pa licenzii, pad jakoj vystupaje honščyk. Tak, u składzie adnaho ź biełaruskich ekipažaŭ — litoviec Daryjus Biesiavičus, jaki jašče ŭ pačatku hoda atrymaŭ licenziju BAF i ŭdzielničaje ŭ našym čempijanacie.

Akramia hetaha rali «Kijeŭskaja Ruś» źjaŭlajecca sumieščanym etapam čempijanatu i kubka Ukrainy pa rali, tamu na start rychtujucca vyjści najmacniejšyja honščyki krainy. Za dva spartyŭnych dnia ŭdzielnikam treba budzie pieraadoleć 9 śpiecučastkaŭ ahulnaj praciahłaściu 131 km, jakija buduć prachodzić u navakollach Kijeva.

Padrabiaznaści vystupleńnia biełaruskich ekipažaŭ na sajcie autosport.by.

0

0

0

0

0

0