Zatrymańni i zastrašvańnie: pierad 3 Lipienia, jak zvykła 8

U roznych haradach Biełarusi prajšli previentyŭnyja zatrymańni aktyvistaŭ demakratyčnych sił.

Siońnia ŭ Homieli zatrymany člen mižnarodnaha abjadnańnia «Małady front» (Čechija) Andrej Cianiuta. Viečaram 1 lipienia jon byŭ schopleny supracoŭnikami milicyi ŭ dvary svajho doma i dastaŭleny ŭ izalatar časovaha ŭtrymańnia (IČU). Maci paviedamili, što 4 lipienia nad Cianiutam pavinien adbycca sud i ŭvieś hety čas jon budzie znachodzicca ŭ IČU. U čym kankretna abvinavačvajecca maładziožny aktyvist, nieviadoma.

Andrej Cianiuta — adzin z zajaŭnikaŭ mitynhu, jaki płanavałasia pravieści ŭ Homieli 3 lipienia, kab pryciahnuć uvahu ŭład da sacyjalna-ekanamičnych prablem. Harvykankam zabaraniŭ arhanizacyju akcyi, ale pradstaŭniki apazicyi zajavili ab namiery pravieści jaje, niahledziačy na zabaronu. Chutčej za ŭsio, heta i stała pryčynaj dla previentyŭnaha zatrymańnia Andreja Cianiuty, miarkujuć jaho adnadumcy.

U Breście 1 lipienia zatrymanyja demakratyčnyja aktyvisty Ivan Stasiuk i Artur Anisimaŭ. Pavodle infarmacyi miascovaha pravaabaroncy Ramana Kiślaka, abodva jany byli zatrymanyja prykładna ŭ adzin i toj ža čas, kala 20.00, u rajonie vulicy Haŭryłava ludźmi ŭ cyvilnym. Maci Stasiuka ab zatrymańni syna paviedamiŭ jaho znajomy, jaki staŭ vidavočcam hetaha zdareńnia. Paśla taho jak žančyna napisała ŭ milicyju zajavu ab hvałtoŭnym źniknieńni syna, joj pazvanili nočču i paviedamili, što Stasiuk znachodzicca ŭ IČU Leninskaha RAUS Bresta pa abvinavačańni ŭ drobnym chulihanstvie. Tam ža, pavodle źviestak pravaabaroncy, znachodzicca i Anisimaŭ, ale ŭ čym abvinavačvajuć jaho — nieviadoma.

Aktyvistaŭ mahiloŭskaj arhanizacyi Biełaruskaja sacyjał-demakratyčnaja partyja (Hramada) Ihara Barysava i Maksima Kavalova siońnia papiaredzili ab niedapuščalnaści ŭdziełu ŭ akcyi maŭklivaha pratestu pa telefonie, pryčym zvanili nieviadomyja ludzi. «Mianie papiaredzili: kali ja „vysunusia“ na akcyju 3 lipienia, mnie pahražaje administracyjny aryšt», — paviedamiŭ Barysaŭ. Pavodle jaho infarmacyi, zaraz milicyja šukaje jašče adnaho aktyvista partyi Andreja Dvihuna.

Pavodle najaŭnych źviestak, u roznych rehijonach krainy rabotnikaŭ dziaržpradpryjemstvaŭ i arhanizacyj papiaredzili ab niedapuščalnaści ŭdziełu ŭ niesankcyjanavanych akcyjach 3 lipienia.

Pa-raniejšamu zabłakavana praca niekatorych internet-supolnaściaŭ u sacyjalnych sietkach, u tym liku hrupy «Revalucyja praz sacyjalnyja sietki» «Ukantakcie». Adny karystalniki naohuł nie mohuć znajści staronku hrupy, inšyja, adkryŭšy jaje, bačać abviestku: «Hrupa časova zabłakiravana i praviarajecca administratarami, tamu što niekatoryja karystalniki ličać, što jana nie adpaviadaje praviłam sajta». Adkrytaj zastajecca tolki staronka abmierkavańnia hrupy.

Z 8 červienia ŭ Biełarusi prajšli ŭžo čatyry takija akcyi — jany pravodzilisia kožnuju sieradu. Apošnija dźvie zakončylisia masavymi zatrymańniami ŭ Minsku i inšych haradach. Bližejšaja akcyja płanujecca na 3 Lipienia.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH