Dačka Jania i Aksana Pačobuty ŭ pieršy dzień suda nad ich baćkam i mužam, fota Julii Daraškievič.
Aksana Pačobut — žonka žurnalista Andreja Pačobuta, jaki siadzić za kratami, čakajučy zakančeńnia sudu, — znajšła ŭ paštovaj skryncy ździeklivy list na rasiejskaj movie, padpisany słovami «biełaruskija patryjoty». Na kanvercie napisany adras, vulica i dom isnujuć, ale ŭ im mienš kvateraŭ, čym ličba paznačanaj kvatery 122, kaža Aksana.
Tekst zrobleny ŭ formie vinšavańnia «z Dniom niezaležnaści RB», skazała Aksana Pačobut i začytała pa telefonie tekst: «Pavažanaja Aksana Hieorhijeŭna, vinšujem vas z Dniom niezaležnaści Respubliki Biełaruś. Vykazvajem vam słovy padtrymki ŭ hety ciažki čas, vaš muž źjaŭlajecca dla nas nieparaŭnalnym prykładam baraćbita za ideju, jaki, nie zvažajučy na žonku i małaletnich dziaciej, śviadoma išoŭ da kanca za efemiernaje ščaście stać symbalem i ŭźnieścisia ŭ vačach vuzkaha koła polskich palityčnych dyletantaŭ. Žadajem vam u hetaje śviata i nastupnyja dni praciahvać zastavacca takoj ža inicyjatyŭnaj i pradprymalnaj, dasiahnuć finansavaha dabrabytu, a taksama nie zastacca zabytaj siabrami i paplečnikami vašaha muža. Ščaścia, lubovi i ŭdačy vam na novym popryščy».
***
Sud nad žurnalistam praciahniecca 5 lipienia ŭ Leninskim rajonnym sudzie Horadni. Andrej Pačobut źjaŭlajecca karespandentam polskaj «Hazety vyborčaj». U asnovie kryminalnaj spravy — publikacyi žurnalista: vosiem z «Hazety vyborčaj» i dźvie ź internetu — ź «Biełaruskaha partyzana» i «Žyvoha časopisa». Žurnalistu pradjaŭlena abvinavačańnie pa dvuch artykułach Kryminalnaha kodeksu: 368 (častka I) «abraza», i 367 (častka I) «paklop» u adnosinach da prezydenta. Prakuror zapatrabavaŭ źniavolić Andreja Pačobuta na try hady.
