U Biełarusi ŭstalavany novy rekord vyšyni budynka 21

U Biełarusi abnoŭleny rekord vyšyni budynka. Samy vysoki dom — 32-paviarchovy chmaračos «Vietraź», jaki budujecca ŭ Minsku na rahu vulic Kalvaryjskaj, Kłary Cetkin, Cimirazieva i Maksima Tanka. Jahonaja vyšynia ŭžo dasiahnuła 100 mietraŭ.

«Zaraz dabudoŭvajecca 30-y pavierch, — paviedamili karespandentu nn.by u ofisie zabudoŭščyka, kampanii «Iterabiełbud». — Vyšynia ad uzroŭniu ziamli da padłohi samaha vierchniaha paviercha, aproč pientchaŭsaŭ, składzie 104 mietry. Da hetaj vyšyni zastałosia dabudavać adzin pavierch (3 m) i dva pierakryćci (pa 0,3 m)». Takim čynam,

na dadzieny momant «Vietraź» užo vymachaŭ na 100,4 mietra.

Naprykancy budoŭli ahulnaja vyšynia chmaračosa dasiahnie 133 mietry za košt mietaličnaj kanstrukcyi na viersie «Vietrazia».

Tak «Vietraź» vyhladaŭ padčas pačatku budaŭnictva 30-ha paviercha.

Jakija budynki ŭvachodziać u śpis samych vysokich u krainie?

Da źjaŭleńnia «Vietrazia» lidarstva ŭtrymlivaŭ 90-mietrovy hmach «Biełbyttechprajektu»,

što kala stancyi mietro «Frunzienskaja» u stalicy. Darečy hetyja dva budynki raździalaje adlehłaść u 700 mietraŭ.

Druhoje miesca zajmaŭ hatel «Biełaruś», vyšynia jakoha składaje 75 mietraŭ. Haścinica čakaje rekanstrukcyi, u vyniku jakoj «padraście» na dva pavierchi.

I, narešcie, na trecim miescy byŭ budynak Nacyjanalnaj biblijateki — 73,6 mietra.

Ciapier ža biblijateka advaliłasia navat nie na čaćviortaje, a na piataje miesca. Vyšynia «Rojał-Płazy» na praśpiekcie Pieramožcaŭ-Mašerava ŭ Minsku ŭžo składaje kala 85 mietraŭ. U vyniku pavinna być kala 100 mietraŭ.

Kali kazać pra zbudavańni luboha kštałtu na terytoryi Biełarusi, to lidarstva jašče doŭhi čas buduć utrymlivać televyški ŭ Kałodziščach pad Minskam, va Ušačach, u Słonimie i pad Mahilovam.

Vyšynia kožnaj ź ich składaje 350 mietraŭ. A voś samy vysoki punkt Biełarusi — hara Śviataja (Dziaržynskaja) — dasiahaje 345 mietraŭ.

Jaŭhien Vasilkoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH