Razhladajecca pytańnie ab stvareńni ŭ Biełarusi nacyjanalnaha navukova-technałahičnaha parku ŭ śfiery nanabijatechnałohij i farmaceŭtyki «Bijahrad».
Pra heta, pavodle infarmacyi pres-słužby ŭrada, paviedamiŭ prem'jer-ministr Michaił Miaśnikovič 1 červienia padčas naviedvańnia Instytuta bijaarhaničnaj chimii NAN Biełarusi.
Stvareńnie takoha parku dazvolić sfarmiravać u Biełarusi novy kłastar u śfiery nanabijatechnałohij i farmaceŭtyčnaj pramysłovaści, miarkujuć va ŭradzie.
«Hetaja tema zastajecca na paradku dnia, — skazaŭ prem'jer-ministr. — Ale, abmiarkoŭvajučy ideju „Bijahrada“, treba, kab heta byŭ nie prosta papuliscki žest. My hladzim, kab tam prysutničali kankretnyja prajekty. Heta pytańni, źviazanyja z kansiervantami, z roznymi preparatami dla siłasavańnia zialonych karmoŭ, z pracesami bradžeńnia, kambikormavaj pramysłovaściu. U hetym płanie my miarkujem, što za bijałahičnaj navukaj, bijałahičnaj pramysłovaściu dobraja, vialikaja pierśpiektyva».
Jak zaznačyŭ kiraŭnik urada, u Biełarusi ŭ hetym kirunku pracujuć niekalki navukova-daśledčych instytutaŭ, u pieršuju čarhu Instytut mikrabijałohii NAN, pa raspracoŭkach jakoha stvarajecca dastatkova šmat vytvorčaściaŭ i pradpryjemstvaŭ u realnym siektary ekanomiki.
Prem'jer-ministr taksama paviedamiŭ, što ŭ najbližejšaj budučyni pad Minskam źjavicca biełaruska-kitajski industryjalny park. «U nas namiačajecca hrandyjozny prajekt, jaki moža nie ŭstupać „Skołkava“, a moža, navat niedzie bolš cikaviejšy. Heta biełaruska-kitajski industryjalny park. My zaraz zaviaršyli čarhovy tur pieramoŭ. Placoŭka pad hety abjekt užo vyznačana ŭ rajonie Nacyjanalnaha aeraporta „Minsk“ płoščaj 5,5 tys. hiektaraŭ. U chutkim časie budziem vychodzić na kiraŭnika dziaržavy z prapanovami ab charaktary mižuradavaha pahadnieńnia i miechaniźmie realizacyi hetaha prajekta», — skazaŭ Miaśnikovič.
Maryna Nosava, BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
