Major KDB, jaki emihravaŭ: Płan «Płošča» raspracoŭvali ŭ AAC pad asabistym kiraŭnictvam Łukašenki 26

Były supracoŭnik KDB, jaki paśla prezidenckaj kampanii 2006-ha apynuŭsia ŭ emihracyi, ličyć, što ŭsia apošniaja prezidenckaja kampanija 2010-ha — sucelnaja pravakacyja.

Piensijanier KDB, major, ahučyŭ «Biełaruskamu partyzanu» svaju viersiju «kryvavaj niadzieli».

Pa źviestkach piensijaniera KDB, atrymanych z krynic va ŭładzie, zadoŭha da kampanii śpiecsłužby pa daručeńni A. Łukašenki ŭziali mierkavanych kandydataŭ i ich aktyŭ pad ščylnaje ahienturnaje i apieratyŭna-techničnaje nazirańnie. Na padstavie zdabytych materyjałaŭ ź liku kandydataŭ byli vyłučanyja «słabyja źviony», na ich padrychtavany adpaviedny kampramat i inšaje, pad ciažaram jakich jany i pavinnyja byli, na dumku raspracoŭščykaŭ, dać zhodu vystupić na BT.

Biełaruskaje telebačańnie zaśviaciła try viadomyja proźviščy: Jarasłaŭ Ramančuk, Ryhor Kastusioŭ, Andrej Dźmitryjeŭ.

Infarmacyja ab pravakacyjach śpiecsłužbaŭ na płoščy (pabitaje škło, źbićcio kandydataŭ), pra Ja. Ramančuka, H. Kastusiova atrymanaja, jak śćviardžaje A. Ramanovič, ad peŭnaj krynicy z asiarodździa Alaksandra Łukašenki ŭžo na treci dzień paśla Płoščy — 22 śniežnia 2010 hoda.

— Vy nazyvajecie padziei 19 śniežnia pravakacyjaj śpiecsłužbaŭ. Što daje vam padstavy vinavacić u hetym KDB?

— Ja sapraŭdy tak liču. Usia dziejnaść Łukašenki šmat u čym źviazanaja z pravakacyjami. I Płošča była zadumanaja z metaj padvieści lidaraŭ apazicyi pad masavyja biesparadki (kali źbiarecca šmat narodu). Heta było bačna i pa tym, jak raźvivalisia padziei 19 śniežnia.

Paśla Płoščy mnie patelefanavaŭ adzin moj dobry znajomy, jaki znachodzicca na tych ža pazicyjach, što i ja, pracuje ŭ adpaviednych strukturach (nie budu nazyvać, dzie, u administracyi prezidenta ci ŭ śpiecsłužbach). Jon mnie ŭ paniadziełak paviedamiŭ (nie budu nazyvać kanał suviazi), što raźbivańnie škła arhanizavanaje śpiecsłužbami, blizkimi da Łukašenki. Jon bolš za ŭsio zavastryŭ uvahu na situacyi z Ramančukom. Nie budu paŭtarać toje, što ŭžo napisana.

Łukašenka asabista z udziełam syna Viktara i niekatorych prykormlenych i abłaščanych kiraŭnikoŭ siłavych viedamstvaŭ RB raspracoŭvaŭ płan pa «ŭcichamirvańni» nasielnictva i naohuł usiaho taho, što źviazana z vybarami, z Płoščaj i pravakacyjaj «žalezam pa škle».

Zahadzia imi praduhledžvałasia «vyrubić» da pačatku šeścia Niaklajeva i Sańnikava, vyklučyć hukaŭzmacnialnuju aparaturu (jak srodak kiravańnia manifiestacyjaj) i pakinuć tych, chto sabraŭsia, biez asnoŭnych lidaraŭ prezidenckaj honki.

U prysutnaści (na vačach i ŭ niepasrednaj blizkaści!) rabotnikaŭ DAI (h.zn. padapiečnych Kulašova), ź ich maŭklivaha biaździejańnia (čytaj — zahadzia ŭzhodnienaha z Łukašenkam dziejańnia) hrupaj śpiecnaza Uładzimir Niaklajeŭ prafiesijnymi ŭdarami byŭ vyviedzieny sa stroju.

Na fota- i videazdymkach, užo apublikavanych i zroblenych supracoŭnikami MUS i KDB, vidać, što ŭ prysutnaści (kali pačynajuć šturchać mašynu DAI) supracoŭnikaŭ DAI raptam źjaŭlajucca ludzi ŭ maskach. A potym Kulašoŭ apraŭdvajecca: heta nie maje ludzi. Jak nie jaho ludzi, kali ŭsio heta adbyvałasia na vačach rabotnikaŭ DAI!

— U čym palahała zaduma hetaha płanu? Davajcie spynimsia na im bolš padrabiazna. Što atrymałasia i što nie atrymałasia va ŭładaŭ?

— Pa infarmacyi toj ža krynicy, Łukašenka da 19 śniežnia vydatna bačyŭ, jaki razmach pryniała vybarčaja kampanija i jak mocna iduć dva asnoŭnych kandytaty, jakija, pa sutnaści, dobra kantaktujuć pamiž saboj, — Niaklajeŭ i Sańnikaŭ. Jon bačyŭ, jakuju charyzmu nabyvaje Niaklajeŭ. Tamu jon chacieŭ znajści pryčynu pazbavicca ad hetych lidaraŭ. Jon nasamreč bajaŭsia ich. U nastupnych vystupach Łukašenka šmat čaho kaža pra toje, što jon zrabiŭ drennaha i što źbirajecca zrabić. Hałoŭnaje, da čaho jon imknuŭsia, — nadoŭha schavać Niaklajeva i Sańnikava. Nu i, viadoma ž, nie dapuścić, kab lidary apazicyi mahli kiravać demanstracyjaj.

— Vy śćviardžajecie, što płan «Płošča» biełaruskija śpiecsłužby raspracoŭvali pad asabistym kiraŭnictvam A. Łukašenki. I hety płan mierkavaŭ vyklučyć jašče da šeścia dvuch kandydataŭ u prezidenty: Uładzimira Niaklajeva i Andreja Sańnikava. Jakuju pahrozu ŭjaŭlali paet i midaŭski pracaŭnik dla Łukašenki (mienavita tak aficyjnaja prapahanda nazyvała dvuch palitykaŭ)?

— Ja nie viedaju płanaŭ Niaklajeva i Sańnikava, ale ich viedaŭ Łukašenka, jaki zabiaśpiečyŭ ich pa poŭnaj prahramie. Jon zabiaśpiečyŭ ich nie tolki vonkavym nazirańniem — jon ich i hladzieŭ, i słuchaŭ. Heta demanstruje i prykład Ramančuka: jaho nie tolki słuchali, ale i hladzieli. Što śpiecsłužbam treba było ŭbačyć i źniać — toje ŭbačyli i źniali.

Kali b demanstracyja pajšła pa mirnym rečyščy, jak heta i mierkavałasia pieršapačatkova, jana b, na moj pohlad, značna pryrasła, i hetaj značnaj kolkaściu ludziej možna było b upłyvać na dalejšaje raźvićcio situacyi. U nastupnyja dni Łukašenka kazaŭ usio, što kruciłasia na jazyku.

— Vy śćviardžajecie, što šerah kandydataŭ i nabližanych da kandydataŭ asobaŭ zahadzia byli ŭziatyja śpiecsłužbami pad kaŭpak. Vy možacie imiony nazvać «hierojaŭ»?

— Usie kandydaty, za vyklučeńniem adnaho — Viktara Ciareščanki — znachodzilisia pad kaŭpakom. Hety byŭ nieprykryty, a ŭsie astatnija ŭ bolšaj ci mienšaj stupieni kantralavalisia.

Niekatoryja kandydaty i nabližanyja da ich ludzi vykarystoŭvalisia dla taho, kab skampramietavać sam instytut demakratyčnych kandydataŭ — Ramančuk, Kastusioŭ.

A niekatorych vystavili ŭ takim śviatle, kab pasiejać razład pamiž aktyvistami, pasvaryć. Heta adnosicca i da Rymašeŭskaha, i da načalnika vybarčaha štaba Niaklajeva.

Demakraty, kiraŭniki partyj krychu prymityŭna padychodziać da pytańniaŭ biaśpieki, kanśpiracyi.

Ja niekalki razoŭ havaryŭ pra heta i Milinkieviču, i Žalapavu — nichto nie źviartaje ŭvahi. Treba ŭličvać, što siońnia ledź nie hałoŭnaja śpiecsłužba — Apieratyŭna-analityčny centr pry prezidencie, dzie ŭsiu ideałahičnuju pracu viadzie Tałstašoŭ Alaksandr Alehavič, były načalnik hałoŭnaha ŭpraŭleńnia abarony kanstytucyjnaha ładu i baraćby z teraryzmam KDB, dastatkova chitry. Kali KDB ŭjaŭlaje saboj takuju kłasičnuju śpiecsłužbu, dzie vykarystoŭvajucca ahienturna-apieratyŭnyja srodki, to AAC bolš vykarystoŭvaje techničnyja srodki i zadziejničaje aficerski skład.

DAVIEDKA. Ramanovič Anufryj Uładzimiravič naradziŭsia ŭ 1943 hodzie pad Hrodnam. Padčas terminovaj słužby ŭ vojsku jaho «znajšoŭ KDB», dzie jon i prapracavaŭ až da 1991 hoda. U 1991 hodzie zvolniŭsia pa ŭłasnym žadańni. Z 1992 hoda zaniaŭsia biznesam. Z 1996 hoda dapamahaŭ biełaruskaj apazicyi — i finansava, i arhanizacyjna. Pracavaŭ u štabach Siamiona Domaša (2001) i Alaksandra Milinkieviča (2006). Paśla vybaraŭ 2006-ha emihravaŭ u Polšču, dzie znachodzicca da siońnia. Sproba aficyjnaha Minska damahčysia ekstradycyi Anufryja Ramanoviča pośpiechu nie mieła. Razam z tym, A. Ramanovič nie atrymaŭ i aficyjnaha statusu biežanca ŭ Polščy.

belaruspartizan.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH