Prakuratura pryznała zakonnym papiaredžańnie KDB žurnalistu Pačobutu, niahledziačy na toje, što sud jašče nie pastaviŭ kropku.
Hrodzienski žurnalist Andrej Pačobut atrymaŭ adkaz z abłasnoj prakuratury, kudy jon dasłaŭ skarhu na dziejańni supracoŭnikaŭ KDB. 8 studzienia žurnalist byŭ schopleny na vulicy Hrodna i dastaŭleny ŭ KDB. Pa vynikach razmovy Pačobutu ŭručyli aficyjnaje papiaredžańnie pra niedapuščalnaść supraćpraŭnych dziejańniaŭ za podpisam načalnika Upraŭleńnia KDB pa Hrodzienskaj vobłaści Ivana Karža. Jaho vinavacili va ŭdziele ŭ niesankcyjanavanaj akcyi 19 śniežnia 2010 h. u Minsku. U toj dzień žurnalista zatrymali na płoščy Niezaležnaści, na nastupny dzień jaho sudzili, ale spravu prypynili dla praviadzieńnia dadatkovaj pravierki. Takim čynam, UKDB pa Hrodzienskaj vobłaści papiaredziła za ŭdzieł u «niesankcyjanavanym pratestnym mierapryjemstvie» čałavieka, čyj udzieł u hetym samym mierapryjemstvie na toj momant jašče nie byŭ dakazany ŭ sudzie. Tamu žurnalist źviarnuŭsia ŭ prakuraturu, kab abskardzić papiaredžańnie. Z adkazu, padpisanaha namieśnikam prakurora Hrodzienskaj vobłaści S. Kavalenkam, vynikaje, što prakuratura nie znajšła parušeńnia zakanadaŭstva ŭ vyniasieńni papiaredžańnia Pačobutu i pastanoŭki jaho na prafiłaktyčny ŭlik.
«Pavodle zakonu, prakuratura pavinna była ŭkazać Ivanu Karžu na parušeńnie zakanadaŭstva, dapuščanaje pry vyniasieńni mnie papiaredžańnia. Ale adkaz prakuratury vyhladaje tak, što jany byccam i biez suda viedajuć, što ja vinavaty, tamu mianie možna śmieła papiaredžvać», — kaža Andrej Pačobut.
Jon raskazaŭ pra vizit u prakuraturu. Z materyjałami pravierki jon zmoh aznajomicca častkova, jašče niekalki dakumientaŭ supracoŭnik prakuratury jamu nie pakazaŭ, zaznačyŭšy, što heta sakretnyja źviestki. Žurnalist źbirajecca abskardzić rašeńnie prakuratury.
Nahadajem, što da 10 lutaha A.Pačobutu pavinny adkazać z vajskovaj prakuratury, dzie znachodzicca jahonaja skarha na dziejańni supracoŭnikaŭ KDB ad 8 studzienia. Pa słovach žurnalista, u časie toj hutarki, kali jamu vynieśli papiaredžańnie, adzin z supracoŭnikaŭ kamitetu niekalki razoŭ udaryŭ jaho pa hałavie. Miedkśpiertyza vyjaviła ŭ jaho nievialiki siniak na hałavie.
