Prezident RF Dźmitryj Miadźviedzieŭ vykazaŭ nadzieju, što praces dałučeńnia Rasii da Suśvietnaj handlovaj arhanizacyi skončycca ŭ 2011 h.
«Rasija ŭžo daŭno hatovaja da ŭstupleńnia ŭ SHA. Ja raźličvaju, što hety praces zavieršycca ŭ hetym hodzie, usie partniory mnie heta abiacali», — adznačyŭ jon, vystupajučy na Suśvietnym ekanamičnym forumie ŭ Davosie.
Pa słovach Miadźviedzieva, uśled za ŭstupleńniem u SHA Rasija płanuje dałučycca da Arhanizacyi ekanamičnaha supracoŭnictva i raźvićcia (AESR). «My ž pracujem nad stvareńniem ahulnaj ekanamičnaj prastory ź Jeŭrasajuzam. Jana budzie zasnavanaja na pryncypach niepadzielnaj biaśpieki, svabody ruchu ludziej, kapitałaŭ i tavaraŭ, na adzinych techničnych standartach. My sfarmavali Mytny sajuz ź Biełaruśsiu i Kazachstanam. Paskorana farmujem razam ź imi adzinuju ekanamičnuju prastoru pavodle madeli, blizkaj da jeŭrapiejskaj», — skazaŭ kiraŭnik rasijskaj dziaržavy.
Pa słovach Miadźviedzieva, usie hetyja pracesy «stratehična značnyja i nie supiarečać adzin adnamu». «Bolš za toje, u vypadku pośpiechu budzie stvorany adziny rynak ad Atłantyki da Cichaha akijanu. Vielizarny rynak, na jakim usim budzie cikaviej i vyhadniej pracavać», — zaklučyŭ jon.
