Prakuratura abskardziła rašeńnie suda ab pakarańni žurnalista štrafam.
Jak paviedamiŭ «Našaj Nivie» hrodzienski žurnalist Andrej Pačobut, prakuratura vyniesła pratest na rašeńnie suda Kastryčnickaha rajona Minska ab pakarańni žurnalista štrafam u pamiery 1.750.000 rubloŭ za «ŭdzieł u niesankcyjanavanym mitynhu» 19 śniežnia ŭ Minsku. Padrabiaznaści pretenzij prakuratury da sudovaha rašeńnia pakul nieviadomyja. «Advakat Alaksandr Halijeŭ, jakija zajmajecca majoj spravaj, taksama pakul nie vałodaje hetaj infarmacyjaj. Dumaju, što bližej da čarhovaha suda my budziem viedać, ale ŭžo ciapier mahu vykazać zdahadku, što prakuraturu nie zadavoliła miakkaść pakarańnia», – prakamientavaŭ Andrej Pačobut. Jon upeŭnieny, što takim čynam ułady reahujuć na jaho žurnalisckuju pracu. «Apošnim časam maje artykuły pra padziei ŭ Biełarusi adny z samych papularnych u «Haziecie Vyborčaj».
Razhlad spravy pryznačany na 28 studzienia ŭ Minskim haradskim sudzie (vuł. Dunina-Marcinkieviča, 1). Pačatak spravy ŭ 15.00.
Nahadajem, što jon byŭ zatrymany na płoščy Niezaležnaści i sutki pravioŭ u aŭtazaku. Jaho sprava razhladałasia ŭ sudzie Kastryčnickaha rajonu. Ale ŭ apošni momant žurnalista vyzvalili, zajaviŭšy, što pa jaho sprava nakiravanaja na dadatkovuju pravierku. Sam Andrej patłumačyŭ, što dapamahli aktyŭnyja dziejańni jaho redakcyi. 8 studzienia Pačobuta prymusova dastavili ŭ KDB na razmovu. Žurnalist śćviardžaje, što hutarka nahadvała dopyt, i jaho navat niekalki razoŭ udaryli pa hałavie. Jon padaŭ skarhu ŭ prakuraturu.
