Paviedamleńnie, dasłanaje redakcyjaj «Aŭtaradyjo»:
«U efiry radyjostancyi Aŭtaradyjo u pieryjad ahitacyjnaj kampanii pa vybarach prezidenta tranślavalisia ahitacyjnyja materyjały kandydataŭ u prezidenty A.Sańnikava i U.Niaklajeva.
Raźmiaščeńnie rabiłasia na padstavie haspadarčych dahavoraŭ u nastupnyja terminy: ahitacyjnyja materyjały A.Sańnikava 15-17 śniežnia 2010 hoda, ahitacyjnyja materyjały U.Niaklajeva 9-17 śniežnia 2010 hoda.
Za čas raźmiaščeńnia ahitacyjnych materyjałaŭ u adras redakcyi Aŭtaradyjo nie pastupała zaŭvah z boku Centralnaj vybarčaj kamisii, taksama nie było vyniesiena piśmovych papiaredžańniaŭ ad Ministerstva infarmacyi.
12 studzienia 2011 h. redakcyjaj Aŭtaradyjo atrymana pradpisańnie RUP «BiełHIE» Minsuviazi RB ab spynieńni dziejańnia dazvołu na prava vykarystańnia radyjočastotnaha śpiektra i zabaronie na ekspłuatacyju radyjoelektronnych srodkaŭ. Zahad vyniesieny na padstavie rašeńnia Respublikanskaj kamisii pa telebačańni i radyjoviaščańni 188/11 ad 11 studzienia 2011 h. za podpisam staršyni kamisii A.V.Pralaskoŭskaha. Rašeńnie kamisii anuluje prava Aŭtaradyjo na naziemnaje efirnaje radyjoviaščańnie ŭ suviazi ź nievykanańniem Aŭtaradyjo tvorčaj kancepcyi i raspaŭsiudžvańniem u efiry infarmacyi, jakaja źmiaščaje publičnyja zakliki da ekstremisckaj dziejnaści. Kankretnaj infarmacyi pra toje, u čym vyjaŭlajecca nievykanańnie kancepcyi abo jak byli vyjaŭlenyja zakliki, u vyrašeńni niama. U ahitacyjnych materyjałach A. Sańnikava źmiaščałasia fraza «los krainy vyrašajecca nie na kuchni, a na płoščy».
Z 12 hadzin 40 chvilin 12 studzienia 2011 hoda efirny vypusk Aŭtaradyjo spynieny. Redakcyja Aŭtaradyjo budzie asprečvać ŭ sudovym paradku pryniataje kamisijaj rašeńnie».
My patelefanavali hiendyrektaru radyjostancyi Juryju Bazanu. Jon paćvierdziŭ, što ich pazbavili prava viaščańnia.
«Aŭtaradyjo» — heta pieravažna muzyčnaja stancyja, jakaja mieła minimum infarmacyjnych materyjałaŭ. Hramadska-palityčnych navin jany nie tranślavali — tolki kulturnuju afišu. Vina radyjostancyi, takim čynam, mahła zaklučacca tolki ŭ źmiaščeńni rekłamnych rolikaŭ kandydataŭ u prezidenty.
Zabarona «Aŭtaradyjo» stanie dramatyčnym udaram nie tolki pa ŚMI, ale i pa biełaruskaj kultury. Na radyjostancyi pracavali mnohija vydatnyja śpievaki i muzyki, a sama stancyja ŭnikalna šmat efirnaha času addavała biełaruskamoŭnaj i biełaruskaj muzycy.
Ad Redaktara. Zaklikajem čytačoŭ, słuchačoŭ i śviet da salidarnaści z «Aŭtaradyjo».
Hladzi jašče: Vajciuškievič pra zakryćcio «Aŭtaradyjo»: Heta daŭno treba było čakać
