Fotakamieru adnaho z zatrymanych zabylisia pačyścić.
Hety zdymak Juraś Špak-Ryžkaŭ zrabiŭ u aŭtazaku, u jakim pravioŭ sutki.
Prychilnik ruchu «Za Svabodu» i były siabra vybarčaj kamisii № 4 Leninskaha rajona Minska Juraś Špak-Ryžkaŭ razam žonkaj Taćcianaj Hračanikavaj 19 śniežnia byŭ na płoščy Niezaležnaści. Juraś rabiŭ fota- i videazdymki na amatarskuju fotakamieru. Pierad samym razhonam jon zrabiŭ 5-chvilinny rolik. Śpiecnaz atočvaje ludziej z usich bakoŭ, hrukajučy dručkami ŭ ščyty. Chrypłyja kryki kamandziraŭ: «Staim, staim!» Demanstranty vyhukvajuć u adkaz na brazhat: «Nie baimsia! Nie baimsia!» Za śpinami pašychtavanych milicyjantaŭ źjaŭlajucca aŭtazaki. «O! Pa nas pryjechali», – zaŭvažaje niechta. U hołasie niama strachu. Składvajecca ŭražańnie, što ludzi nie vierać, što budzie razhon. Ale voś užo čujucca pieršyja kryki: «Što vy robicie?! Fašysty!» Abryŭki zahadaŭ na zatrymańnie.
Hety videarolik, a taksama fotazdymki, zroblenyja ŭ adnym z aŭtazakaŭ, ščaśliva zachavajucca. Jurasia z žonkaj zatrymali pa-asobku. Jon pravioŭ sutki ŭ čakańni suda ŭ aŭtazaku. Pierad sudom, jaki admieraŭ jamu 10 sutak aryštu, vypadkova sustreŭsia z žonkaj na Akreścina i paśpieŭ pieradać joj kamieru. U Taćciany, jakaja adbyvała svaje 15 sutak na vulicy Skaryny, fotaaparat prosta pakłali razam z asabistymi rečami, nie vydaliŭšy ź jaho ničoha. «Dziaŭčaty z majoj kamiery niejkim čynam zdoleli pranieści z saboj mabilny telefon. Fatahrafavali turemny pobyt. Dyk achoŭniki niejak daviedalisia. Vyklikali na hutarku, vydalili ź jaho ŭsie fotazdymki», – raskazała Taćciana Hračanikava. Pry zatrymańni jaje źbili. Śpiecnazaviec adabraŭ u jaje šalik z «Pahoniaj». Jaje, jak i Jurasia, abvinavacili va ŭdziele ŭ niesankcyjanavanaj akcyi, vykrykvańni łozunhaŭ «Žyvie Biełaruś» i «Sychodź» i niepadparadkavańni milicyjantam.
U svaim błohu Juraś Špak-Ryžkaŭ vykłaŭ cełuju halereju amatarskich partretaŭ kalehaŭ pa adsidcy, a taksama nie biez humaru apisaŭ svaje pryhody na Płoščy i ŭ turmie.
