Viečaram 4 śniežnia ŭ dvary doma na vulicy Varanianskaha adbyłasia nievialikaja aŭtaavaryja z udziełam siamji Alesia Michaleviča. Siastra palityka, Volha, jakaja była za rulom aŭtamabila ŭ momant zdareńnia, raspaviała «Našaj Nivie» ab niezrazumiełych akaličnaściach zdareńnia.
«Incydent adbyŭsia pryblizna ŭ 18.30. My ŭžo pryparkavali svaju Chondu Cyvik.Adno što nam zaminaŭ vializny krasovier, jaki stajaŭ akurat pierad nami. I voś u momant, kali moj muž vychodziŭ z mašyny, u nas zzadu ŭrezaŭsia nievialiki mikraaŭtobus Piežo. Padrapaŭ kryło i dźviery. U mikraaŭtobusa było paškodžanaje lustra», — raspaviała Volha Michalevič.
DAI vyklikaŭ kiroŭca Piežo. Kali na miesca avaryi padjechała milicejskaja mašyna, u jaje dla składańnia pratakoła zaprasili sieści muža Volhi, Ihara Zienčyka, i kiroŭcu mikraaŭtobusa. Adnak prostaja pracedura zaciahnułasia da poźniaj nočy…
«Prykładna praz hadzinu kapitan, jaki składaŭ pratakoł, raptam zajaviŭ mnie što jon z maim mužam pavinien pajechać u Kastryčnicki RUUS, kab vyśvietlić niejkija akaličnaści.
U muža zaraz časova niama pašpartu i ja ŭspryniała heta spakojna. Voś tolki toje, što inśpiektar zabraŭ z saboj usie maje dakumienty (papiery na aŭtamabil i paśviedčańnie kiroŭcy), mianie naściarožyła.A amal praz hadzinu mnie ŭžo z RUUS pazvaniŭ muž i paviedamiŭ, što jaho chočuć tam pratrymać da ranicy, i što nibyta na heta jość dazvoł prakurora. My ŭsie vyrašyli pajechać tudy», — raspaviała Volha Michalevič.
U Kastryčnickim RUUS cudy praciahvalisia. Niahledziačy na toje, što ŭ adździaleńnie milicyi pryjechaŭ brat Ihara Zienčyka z usimi nieabchodnymi dakumientami, udzielnika DTZ ŭparta admaŭlalisia adpuskać. Tolki kali Volha Michalevič napisała zajavu na imia načalnika RUUS ab niezakonnym zatrymańni jaje muža, Ihara pahadzilisia adpuścić.
«Ja napisała zajavu i paprasiła jaje zarehistravać. Tolki tady majho muža adpuścili, pryčym nastojliva prasili parvać zajavu u ich na vačach», — raskazvaje Volha.Hramadzianskaha muža Volhi Michalevič pratrymali ŭ pastarunku ad 19.30 da 23.30 — čatyry hadziny zamiest zakonnych troch.
Ihar Zienčyk abaviazaŭsia źjavicca na raźbiralnictva pa fakcie DTZ 6 studzienia ŭ 16 hadzin. Pakul mienavita jaho supracoŭniki DAI ličać vinavatym u zdareńni.
Uładalnica paškodžanaha aŭtamabila, Volha Michalevič, ličyć, što ŭ hetaj spravie šmat niezrazumiełaha:
«Tut vielmi šmat roznych akaličnaściaŭ. I krasovier, što pieraharadziŭ nam darohu, i toje, što ŭ pastarunak advieźli majho muža razam z maimi dakumientami, i ŭpartaje niežadańnie adpuskać jaho, i navat toje, čamu ŭ RUUS amal uvieś čas znachodziŭsia kiroŭca Piežo,jaki ŭvohule byŭ volny jechać, kudy žadaje, jašče ad vośmaj hadziny viečara… Mahčyma, što heta ŭsio praz majo proźvišča — Michalevič. Ja pytałasia ŭ supracoŭnikaŭ RUUS, ci tak heta. Jany pytańniu nie ździvilisia i ŭ adzin hołas zajaŭlali, što sprava z palitykaj nie maje ničoha ahulnaha».
