Najlepšymi ŭ Biełarusi za 2010 hod pryznanyja 312 tavaraŭ

Jany byli vypuščanyja 189 arhanizacyjami.

Jak paviedamiła pres-słužba Dziaržstandarta, takija vyniki konkursu «Najlepšyja tavary Respubliki Biełaruś», jaki byŭ abjaŭleny i praviedzieny Dziaržstandartam sumiesna z abłasnymi vykanaŭčymi kamitetami i Minharvykankamam užo ŭ dziaviaty raz.

Tradycyjna najbolš pradstaŭničaj akazałasia naminacyja «Charčovyja tavary», dzie najlepšymi pryznanyja 190 najmieńniaŭ pradukcyi 95 ajčynnych pradpryjemstvaŭ. Dalej iduć naminacyi «Pradukcyja vytvorča-techničnaha pryznačeńnia», u jakoj vyznačany 62 tavary-pieramožcy 51 pradpryjemstva, i «Pramysłovyja tavary dla nasielnictva i vyraby narodnych promysłaŭ» — 59 tavaraŭ, što vypuskajucca 42 arhanizacyjami.

Zvańnia łaŭreata konkursu taksama ŭdastojena padraździaleńnie transpartnaha RUP «Bresckaje adździaleńnie Biełaruskaj čyhunki» — Brescki vahonny ŭčastak u naminacyi «Pasłuhi nasielnictvu». Status «Navinka hoda», zasnavany z metaj stymulavańnia vypusku novych vidaŭ pradukcyi, palapšeńnia jaje charaktarystyk i ŭłaścivaściaŭ, prymianieńnia sučasnych technałohij i materyjałaŭ, prysudžany 22 tavaram roznaha pryznačeńnia.

Siarod łaŭreataŭ takija pradpryjemstvy, jak AAT «Savuškaŭ pradukt», vaŭkavyskaje AAT «Biełłakt», SP AAT «Spartak», dziaržaŭnaje pradpryjemstva «Haradski małočny zavod № 1» (Minsk), SAAT «Kamunarka», AAT «Barysaŭski miasakambinat», AAT «Babulin hładyš», STAA «Biełviest», STAA «Marka», VA «Homsielmaš», AAT «Homielski chimičny zavod», AAT «Krasnasielskbudmateryjały», AAT «Stužka», ZAT «Maładziečnamebla», SP «VeskaBieł» TAA, RUP «Biełaruski mietałurhičny zavod», RUP «Minski traktarny zavod», TAA «Zavod aŭtamabilnych pryčepaŭ i kuzavoŭ «MAZ-Kupava», AAT «Mahiloŭchimvałakno» i inš.

U pres-słužbie zaznačyli, što «ŭ konkursnym ruchu za najlepšyja tavary aktyŭna ŭdzielničajuć arhanizacyi małoha i siaredniaha biźniesu, jakija prapanoŭvajuć kankurentazdolnuju, u tym liku impartazamiaščalnuju, pradukcyju». Pa vynikach konkursu 2010 hoda heta asabliva charakterna dla pramysłovych tavaraŭ dla nasielnictva. Siarod łaŭreataŭ ZAT «Dzilis Kaśmietyk» (tualetnyja vody sieryi Atlantica), ZTAA «Kondar» (vodna-dyśpiersijnaja hruntoŭka), VPUP «Viktoryja» (žaroŭni lityja aluminijevyja), PUHP «Romhil» (trykatažnyja vyraby dla žančyn z pražy z vysokim utrymańniem šerści), AAT «Aktamir» (lalki).

Arhanizacyjam, tavary jakich udastojeny zvańnia łaŭreata, buduć uručanyja dypłomy i dadziena prava raźmiaščeńnia łahatypa konkursu na tavarach i ich upakoŭcy, a taksama ŭ dakumientacyi i rekłamnych materyjałach.

0

0

0

0

0

0

Maryna Nosava, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH