Pačaŭsia pakaz filma «Ščaŭkunok i Pacučyny karol» u farmacie 3D 3

Pakaz novaha filma Andreja Kančałoŭskaha «Ščaŭkunok i Pacučyny karol» u farmacie 3D adbyŭsia ŭ abnoŭlenym minskim kinateatry «Centralny» i ŭ novym 3D kinateatry «Mir» u Breście.

Asnoŭnaja častka zdymak prachodziła na praciahu 15 tydniaŭ u novych paviljonach kinastudyi «Štern» niepadalok ad Budapiešta (Vienhryja), a taksama na raźmieščanaj blizu naturnaj placoŭcy, dzie mastak-pastanoŭščyk Kievin Fips («V značyć viendeta», «Troja», «Braty pa zbroi») uznaviŭ atmaśfieru staroj Vieny. Značnuju ŭvahu jon nadaŭ fasadam budynkaŭ toj epochi i brukavanym vulicam. Kab pieradać atmaśfieru «pacučynaha» śvietu, dzionnyja vuličnyja sceny zdymalisia nočču, što dazvoliła atrymać efiekt «biaskolernaha dnia».

Biudžet hetaha mižnarodnaha prajekta skłaŭ 90 młn dołaraŭ, što amal u dva razy bolš, čym biudžet samaha darahoha rasijskaha prajekta 2010 hoda «Stomlenyja soncam — 2» (55 młn dołaraŭ).

Ideju ekranizacyi znakamitaj kazki Hofmana Kančałoŭski vynošvaŭ bolš za 40 hadoŭ. Saŭndtrekam da filma stała kłasičnaja muzyka z baleta Piatra Čajkoŭskaha ŭ sučasnaj apracoŭcy kampazitara Eduarda Arciemjeva. Na jaje pakładzieny i teksty vaśmi piesień, napisanyja ŭładalnikam «Oskara», papularnym anhlijskim paetam i libretystam seram Cimam Rajsam (rok-opiera «Isus Chrystos — supierzorka», multfilmy «Aładzin» i «Karol Leŭ», miuzikł «Pryhažunia i Pačvara» i inš.).

Rolu Pacučynaj karalevy ahučyła Ała Puhačova, a Pacučynaha karala — Filip Kirkoraŭ.

Rolu ž mamy hierojaŭ-dzietak i Śniehavoj fiei vykanała žonka Kančałoŭskaha Julija Vysockaja. Darečy, jana vyrasła ŭ Minsku, a jak aktorka ŭzhadavałasia ŭ Teatry imia Janki Kupały.

BiełaPAN; Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH