Za dva dni da vybaraŭ «Sovietskaja Biełoruśsija» nazyvała viadučaha ANT adnym z najlepšych na našym telebačańni.
Siarhiej Darafiejeŭ
17 śniežnia ŭ haziecie «Sovietskaja Biełoruśsija» była apublikavanaja hutarka z papularnym viadučym tok-šou «Vybar» i «Vybar +» Siarhiejem Darafiejevym. Va ŭstupie da intrevju žurnalistka nie škadavała kamplimientaŭ na adras telezorki: «U adroźnieńnie ad bolšaści telekaleh Siarhiej Darafiejeŭ redka zastajecca niejtralnym naziralnikam haračych dyskusij, jakija ŭźnikajuć u jaho tok-šoŭ kožny paniadziełak. Chavać emocyi ŭ efiry — nie ŭ jaho praviłach. Za košt hetaha i prahrama vyjhraje ŭ vidoviščnaści i vastryni, i sam Siarhiej zasłužyŭ reputacyju adnaho ź lepšych viadučych našaha telebačańnia. Čarhovaje paćviardžeńnie tamu — novy teleprajekt ANT «Vybar +», dzie Darafiejeŭ usio hetak ža nie paźbiahaje niazručnych pytańniaŭ i nie baicca ŭzdymać ryzykoŭnyja temy. Adnak pa-za efiram jon pa-raniejšamu demanstruje strymanaść, jakaja stała takoj redkaściu dla siońniašnich telezorak, vietliva, ale rašuča ŭchilajučysia ad hutarak pra ŭsio, što nie maje dačynieńnia da jaho televizijnaha «Vybaru».
A ŭžo ŭ niadzielu Siarhiej Darafiejeŭ prademanstravaŭ na praktycy, što sapraŭdy «nie paźbiahaje niazručnych pytańniaŭ i nie baicca ŭzdymać ryzykoŭnyja temy», zadaŭšy ŭ pramym efiry staršyni CVK Lidzii Jarmošynaj kolki nadzvyčaj niepryjemnych pytańniaŭ. U paniadziełak niaźmienny hałoŭny hieroj haziety «Sovietskaja Biełoruśsija» i pa sumiaščalnictvie jaje faktyčny haspadar u časie pres-kanfierencyi zhadaŭ pra tok-šou «Vybor», nazvaŭšy Darafiejeva «maładym žurnalistam, jakoha treba pastavić na miesca». Tut ža papaŭźli čutki pra zvalnieńnie viadučaha, ale na telekanale kažuć pra płanavy adpačynak, sam žurnalist kaža, što pa-raniejšamu pracuje na svaim miescy.
Prapanujem vašaj uvazie frahmient hutarki. Niekatoryja adkazy, zvažajučy na padziei ŭ časie niadzielnaha vypusku prahramy «Vybar» i ich nastupstvy, padajucca amal praročymi.
— Čuła ad vašych kalehaŭ, Siarhiej, što dla padrychtoŭki vypuskaŭ svajoj novaj prahramy «Vybar +» vy karystajeciesia asabistym archivam, jaki źbirali cełych 11 hadoŭ...
— Archiŭ — heta hučna skazana. Tak, natatki na palach. Pa-mojmu, heta narmalnaja praktyka ŭ pracy luboha žurnalista. Krynic infarmacyi siońnia vielmi šmat. I praktyčna kožnaja ź ich u toj ci inšaj stupieni anhažavanaja. Dla taho, kab atrymać traktoŭku, najbolš blizkuju da praŭdy, lepš za ŭsio pracavać ź infarmacyjaj samomu. Ale moj archiŭ — zusim nie tradycyjnyja ciažkija tečki na palicach, chutčej kalekcyja najbolš značnych faktaŭ našaj niadaŭniaj historyi, niečyja cikavyja vykazvańni na peŭnuju temu...
— I jakoje hałoŭnaje ŭražańnie 2010 hoda vy tam zachavali?
— Ja vielmi rady, što praktyčna ŭsio, što rabiŭ u efiry ŭ hetym hodzie, dyktavałasia tolki majoj pazicyjaj i tolki maim žadańniem. Chaciełasia b i na budučyniu pažadać sabie takoj prafiesijnaj voli. Choć svaboda časam bahataja roznymi nastupstvami...
— Sudovyja sprečki, padazraju? Časam vy dazvalajecie sabie vielmi śmiełyja vykazvańni ŭ studyi...
— Nie chaciełasia b vyhladać samaŭpeŭnienym, ale čaściej atrymoŭvajecca apiaredžvać vierahodnyja ciažby. Praŭda, nie zaŭsiody ...
— Možacie adznačyć niešta takoje ŭ adychodziačym hodzie, što vas ździviła? U ludziach, naprykład?
— Viedajecie, niejak pierastaŭ ja ździŭlacca. Chacia... U pracesie padrychtoŭki da efiraŭ vyjaviŭ, jak šmat u nas u krainie prystojnych ludziej, niahledziačy na toje, što z hetaj prystojnaściu časam niaprosta žyviecca. Ludziej, sumlennych ŭ svajoj prafiesii, aktyŭnych, z vyraznaj žyćciovaj pazicyjaj, jakija nie aścierahajucca jaje vykazvać, navat kali jana nie supadaje ź mierkavańniem bolšaści. Heta vielmi jarkija ludzi, sapraŭdnyja asoby. Jašče hod tamu ja dumaŭ, što takich mienš.
* * *
Siarhiej Darafiejeŭ — adzin z samych jarkich pradstaŭnikoŭ novaha pakaleńnia biełaruskaj televiadučych. Jon naradziŭsia ŭ 1980 hodzie ŭ Minsku, zakončyŭ BNTU, a žurnalisckuju adukacyju atrymlivaŭ za miažoj, vyjhraŭšy hrant Dziarždepartamienta ZŠA. Staŭ viadučym tok-šou «Vybar» paśla adjezdu ŭ Maskvu Jahora Chrustalova. Pa mierkavańni ekśpiertaŭ i hledačoŭ, prahrama ad hetaha tolki vyjhrała — u joj stali źjaŭlacca surjoznyja temy dla dyskusij.
