Pytańni, źviazanyja z pastaŭkami vuhlevadarodnaj syraviny, Biełaruś i Rasija pavinny ŭrehulavać da kanca hoda, zajaviŭ prem'jer-ministr biełaruskaha ŭrada Siarhiej Sidorski na sustrečy z rasijskim kaleham Uładzimiram Pucinym 8 śniežnia ŭ Maskvie.
«Jość šerah pytańniaŭ, jakija tyčacca pastavak vuhlevadarodnaj syraviny, ja chacieŭ by, kab my ich abhavaryli i z pačatku hoda našy ekanomiki pracavali efiektyŭna», — cytuje Sidorskaha RIA Novosti.
Biełaruski premjer paviedamiŭ, što dakumienty pa farmiravańni Adzinaj ekanamičnaj prastory z boku Biełarusi «znachodziacca ŭ vysokaj stupieni hatoŭnaści». «Ale jość šerah pytańniaŭ, jakija nieabchodna ahavaryć», — dadaŭ jon.
Pieršy
Uładzimir Pucin, u svaju čarhu, raźličvaje na siońniašnich pieramovach ź biełaruskaj delehacyjaj vyrašyć usie pytańni, što zastalisia, pa farmiravańni Adzinaj ekanamičnaj prastory (AEP).
«Sustrakajemsia, jak i damaŭlalisia, u suviazi z faktyčnym zakančeńniem sumiesnaj pracy nad vialikim pakietam dakumientaŭ, jaki pavinien być pakładzieny ŭ asnovu Adzinaj ekanamičnaj prastory troch krain — Rasii, Biełarusi i Kazachstana», — skazaŭ Pucin.
«Ale, — pradoŭžyŭ jon, — jak my i damaŭlalisia, jość niekatoryja pytańni, vielmi adčuvalnyja dla ekanomik Rasii i dla ekanomiki Biełarusi, jakija my pavinny ŭrehulavać u dvuchbakovym farmacie dla taho, kab ŭvieś pakiet pa Adzinaj ekanamičnaj prastory byŭ zapuščany ŭ realnaje žyćcio».
Jak paviedamlałasia raniej, rašeńnie ab siońniašniaj sustrečy było pryniata Pucinym i Sidorskim napiaredadni viečaram padčas telefonnaj razmovy. Premjery, u pryvatnaści, damovilisia ŭzhadnić usie pytańni, što tyčacca stvareńnia AEP, da sustrečy prezidentaŭ.
Na 9 śniežnia ŭ Maskvie zapłanavana pasiadžeńnie vyšejšych orhanaŭ Mytnaha sajuza Rasii, Biełarusi i Kazachstana i JeŭrAzES.
U listapadzie na pasiadžeńni ŭrada RF Uładzimir Pucin zajaŭlaŭ: «Kali ratyfikacyja ŭsiaho pakieta pa Adzinaj ekanamičnaj prastory adbudziecca raniej za 1 studzienia 2012 hoda, to my adpaviednym čynam adreahujem u našych uzajemaadnosinach u śfiery ekanamičnaha supracoŭnictva, u pryvatnaści ŭ śfiery enierhietyki, pa pytańni prymianieńnia abo nieprymianieńnia mytnych pošlin na niekatoryja vidy tavaraŭ».
Miarkujecca, što AEP stanie nastupnaj stupieńniu intehracyi krain Mytnaha sajuza. Jana budzie praduhledžvać svabodny ruch tavaraŭ, pasłuh, kapitałaŭ i pracoŭnaj siły, uzhodnienuju makraekanamičnuju palityku.
