U minułuju piatnicu ŭ redakcyi «Komsomolskaj pravdy v Biełarusi» adbyłasia sustreča kandydataŭ u prezidenty z žurnalistami. Jak dziaržaŭnymi, tak i niedziaržaŭnymi. Žurnaliscki dopyt kandydata ad AHP Jarasłava Ramančuka.
Pra płahijat ad uładaŭ
«Dvoječniki ŭvohule nie razumiejuć, što rabić. Viedajecie, jość ahulny pryhožy płan doma. Ale da jaho jašče jość 20 instrukcyj, jak jaho takim zrabić. Śpisvać ułady pačali značna raniej za hetuju kampaniju. Niekalki prykładaŭ: płoski padatak za jaki my zmahalisia ad kanca 1990‑ych, admiena licenzavańnia roźničnaha handlu, zajavačny pryncyp rehistracyi. Hetym ułada siońnia hanarycca, a nami heta było prapanavana vielmi daŭno. Na moj pohlad ułady ničoha nie zmohuć zrabić z hetym dakumientam (prahramaj Ramančuka — NN), bo niama našych tłumačałak. Jany buduć rabić, što napisana ŭ prahramie sacyjalna‑ekanamičnaha raźvićcia, dzie jość dziesiatki pieraličanych metaŭ. Hetyja mety buduć dadavacca prahramami inavacyjnaha raźvićcia — 312 nakirunkaŭ. Dla mianie, kali jość inavacyjnych 312 nakirunkaŭ, to niama nivodnaha. Intelektualny patencyjał siońniašniaha ŭrada siabie vyčarpaŭ. Usia płanavaja ekanomika dachodzić da łahičnaha zaviaršeńnia. I jano budzie chutčejšym pa miery taho, jak Rasija budzie źmianšać enierhietyčny hrant. Siońnia jon składaje 7% VUP, a kolki budzie naleta my nie viedajem».
Pra AHP
«Partyja maje vielmi dobry dośvied parłamientu. My ŭdzielničali va ŭsich kaalicyjach, byli prychilnikami vyłučeńnia adzinaha kandydata. Partyja — heta 50% toj kamandy, što my majem. Siońnia jość 20‑25% ludziej, što aryjentujucca na kłasičnuju apazicyju. Naša ž kampanija nakiravanaja na toje, kab adciahnuć ludziej, jakija nie viedajuć za kaho hałasavać: za ŭładu, ci apazicyju».
Pra žančyn
«U parłamiencie budzie pa mienšaj miery tracina žančyn. Pierad vystupam na TB ja mieŭ sustrečy z pradstaŭnikami žanočych arhanizacyj, i jany krytykavali mianie, što nie padniaŭ «žanočaje pytańnie». Kali biurakratyja zaminaje navat mocnym mužčynam bieź siemjaŭ, to ŭjaŭlaju, jak jana zaminaje žančynam. U nas vielmi časta adbyvajecca dyskryminacyja pa pałavomu pryncypu. Jana padychodzić pa ŭsich pryncypach, ale na pracu jaje nie biaruć. Dla žančyn libieralnaja ekanomika našmat bolš sacyjalnaja i značnaja. Što datyčyć kiraŭnictva, to ŭ nas nie budzie kvotaŭ. Ja liču absalutna narmalnym, što žančyny daminujuć u Ministerstvach adukacyi ci achovy zdaroŭja. Ja nie suprać taho, kab žančyna ŭznačaliła Ministerstva abarony, kab pakazać, što za hetymi strukturami patrebien hramadzianski kantrol».
Pra seksizm
«Časta kažuć, čym słaŭnaja Biełaruś? U nas jość aziory, rečki, darohi, pryhožyja žančyny. Nasamreč pryhožych žančyn heta abražaje. Bo my nie kažam u kantekście: dobryja kiraŭniki, ekanamisty, a kažam u kantekście dobrych upryhožvańniaŭ. Z hetym treba skančvać. Mnie niejak skazali, što ŭ ZŠA ja b užo razoŭ piać adsiadzieŭ. Za toje, što ja pa‑italjansku adnošusia da pryhožaha połu. Abdymki, siabroŭski pacałunki. U nas inšyja tradycyi. Ich u adroźnieńni ad zakona nielha pierapisać. Zakony pavinny pisać pad našych ludziej, pad naš mientalitet. Ujavicie, pryniali b my zakon ab žorstkim abychodžańni z žyviołami. Jak jaho možna prakantralavać? Takija zakony nibyta ź inšaha vymiareńnia».
Pra dziaŭčynu
«Ja žaniusia pa‑lubomu. Žaniŭsia b u sakaviku, kab raniej nie pamior moj baćka. Kali b heta było tak važna palityčna, to možna było. Ale my z majoj dziaŭčynaj uzhadnili, što heta adbudziecca ŭ krasaviku nastupnaha hodu paśla Vialikdnia. My sustrakajemsia try hady. Jana mahistr ekanomiki, indyvidualny pradprymalnik, choča pastupać u aśpiranturu, siabra majoj inicyjatyŭnaj hrupy. Joj 23 hady. Nas nie zasmučaje roźnica va ŭzroście».
Pra viasielle prezidenta
«Budzie ścipły rośpis u Čyrvonym kaściole. Buduć zaprošanyja niekalki siabroŭ. Ja suprać pyšnych viasiellaŭ. My ŭzhadnili, što lepš patracić tydzień na padarožža, čym rabić śviatkavańnie na 1000 čałaviek z pjankaj».
Pra kamandu‑refarmataraŭ
«Kamanda składajecca z troch častak. 1. Ludzi, što majuć dośvied refarmavańnia. Naprykład, Michaił Čyhir, Stanisłaŭ Bahdankievič. Jość ludzi, što i siońnia pracujuć u Nacbanku. Naturalna, što ja nie budu nazyvać ich proźviščy. Heta sapraŭdnyja prafiesijanały‑patryjoty, jakija ŭśviedamlajuć, što inflacyja — zło, i jana pavinna być mienš za 2%. Dośvied Alaksandra Sasnova, što rychtavaŭ piensijnuju reformu. 2. Ludzi, što pracujuć u roznych jurydyčnych kampanijach, pradprymalniki. Im ad 30 da 40 hadoŭ. Ja ŭpeŭnieny, što vy ich viedajecie, ale pakolki ŭrad jašče nie pačali farmiravać, to nie chaču nazyvać. 3. Ludzi z suśvietnymi imionami mierkavańnie jakich mnie vielmi važnaje. Heta Mark Łaar. Ja bačyŭ jaho ŭ vieraśni. Jon kaža, kali treba, to hatovy pryjechać u luby momant. Jon kansultavaŭ šmat uradaŭ u śviecie. Dvojčy byŭ premjeram Estonii. Ichnija reformy byli adnymi z samych paśpiachovych. Lešak Balcarovič — moj charošy siabar. Pa piensijnaj reformie Chase Piniera — rodny brat prezidenta Čyli. Były daradca ŭrada Rasii Andrej Iłaryjonaŭ. Ja nie kasmapalityčny, ja patryjatyčny, bo vykarystoŭvaju najlepšy suśvietny dośvied. Reformy heta nie tolki rasijskija, ci ŭkrainskija. Ichnim šlacham my nie pojdziem».
Pra zarobak u 500 tysiač
«Jość taki paniatak, jak akazanyja pasłuhi da pastupleńnia hrošaj. Dyk voś tyja hrošy, što ja zarabiŭ u 2009 hodzie mnie pa dakumientach zaličyli tolki na 2010 hod. Heta čysta techničnaja pramaška. Ja zarablaju prykładna 400 dalaraŭ u miesiac».
Pra Łukašenku
«My nie dystancyrujemsia ad palityčnych pytańniaŭ. Adrazu paśla abrańnia mianie prezidentam budzie praviedzieny kanstytucyjny refierendum. Treba adnavić raździaleńnie ŭładaŭ, abmiežavać terminy ŭłady prezidenta, parłamient budzie adnapałatny. Ja heta nie kažu na pieršym miescy, bo jość technałohija vybaraŭ. Status byłoha prezidenta krainy, biezumoŭna, pavinien być. Pavinna być piersanalnaja piensija, achova. Nijakaha pravavoha imunitetu nie budzie. Luby hramadzianin budzie mieć prava źviarnucca ŭ sud na Ramančuka, Łukašenku, Piatrenku. Nie budzie palityčnaha pieraśledu, pomsty. Heta ja abiacaju».
Pra balučyja reformy
«Ujaŭlajecie, što my pačynajem pramovy sa słovaŭ: «Spadarstva, zaciahniem razam pajasy». Ale i heta treba kazać. Jašče try hady nazad reformy byli b mienš balučyja. Jak prajści hety etap? Jość niekalki varyjantaŭ: 1. Baranić intaresy namienkłatury; 2. Abaraniać ad hetaha šoku samych abiazdolenych. Siońnia 20% samych bahatych ludziej krainy majuć bolš dapamohi, a treba, kab heta atrymlivali 20% najbiadniejšych. Ludzi, što buduć zvolnienyja z KDB, milicyi, čynoŭnikaŭ majuć adukacyju, sacyjalnyja suviazi i kapitał. A najbolšaja pahroza dla čałavieka 30‑50 hadoŭ, što pracuje na bujnym pradpryjemstvie jamu niama kudy pajechać. Ja nie liču metazhodnym šmat układvać u sielskuju haspadarku. My nie možam sabie hetaha dazvolić. Našy vydatki buduć sacyjalnaaryjentavanyja, a nie buduć mieć karparatyŭnaha charaktaru. Jašče kali ty robiš terapiju ciaham hodu heta adno, a kali piać — to ad bolu možna pamierci. Treba źminizavać čas takich reform».
Pra 89 tysiač 100 rubloŭ achviaravańniaŭ
«Ja dumaju heta 82‑hadovaja piensijanierka z Hrodna, jakaja maje dźvie vyšejšyja adukacyi. U jaje stolki enierhii. Kaža: «Ja pajdu prahałasuju za vas rublom, pieraliču hrošy». Moža i jana. Takija ludzi vielmi aktyŭnyja i čystyja. Ich patencyjał bolšy, čym navat tysiačy maładzionaŭ, što pjuć piva i nie vierać u źmieny. Biźniesmieny kažuć, što hatovy dać, ale ŭjavicie, kolki budzie pravierak na ich».
Pra źniaćcio na karyść Niaklajeva
«Takoha varyjanta nie było. Byli damovy pra supolnuju stratehiju supracy. My svaje abaviazki vykanali, ale naš partnior vyrašyŭ, što na hetym para pastavić kropku. Ja tut absalutna čysty, ni pad kaho zdymacca my nie budziem. Ja b na miescy i Sańnikava, i Niaklajeva źniaŭsia b pad mianie. Ja biełaruski prajekt, AHP — biełaruskaja partyja. Navat naša ŭłada nie kaža, što Ramančuk maskoŭski ci varšaŭski prajekt. Kali b ja mieŭ miljon ci dva, to moža b pa‑inšamu siabie pavodziŭ. A tak u nas vielmi biudžetnaja kampanija. Tamu ja raznošu ŭlotki, staju ŭ pikietach».
