1 śniežnia, u pieršy dzień zimy, u žyvym efiry BT vystupiŭ kandydat u prezidenty Andrej Sańnikaŭ.U svaim vystupie kandydat zhadaŭ pra časy kiravańnia Łukašenki, trahičnuju śmierć svajho paplečnika Aleha Biabienina, taksama raspavioŭ ab svajoj prahramie i źviarnuŭsia da hledačoŭ z zaklikam pryjści na Płošču 19 śniežnia, kab adstajać pieramohu. Zaklučnaja tracina pramovy prahučała
Sańnikaŭ pačaŭ svoj vystup nastupnymi słovami:
«Jašče na niekalki dzion my stali bližejšyja da pieramohi».Kandydat raspavioŭ, što paśla jaho pieršaha vystupu da jaho pačali padychodzić ludzi i vykazvać słovy padtrymki. Šmat zvanili i dasyłali mnostva listoŭ. «Ja naviedaŭ paśla svajho pieršaha vystupu vosiem haradoŭ i ŭsiudy ludzi vykazvali mnie padtrymku», — paviedamiŭ Sańnikaŭ. Jon taksama adznačyŭ, što pavodle niezaležnych sacyjałahičnych apytańniaŭ rejtynh Łukašenki źniziŭsia da 20 pracentaŭ, u toj čas jak ahulny rejtynh demakratyčnych kandydataŭ pieravyšaje 50. «Biełaruś pračynajecca. Łukašenka ŭžo prajhraŭ. Ja vyjhraju u Łukašenki ŭ druhim tury», — padvioŭ vynik kandydat.
Sańnikaŭ padčas vystupu niekalki razoŭ nazvaŭ proźvišča Niaklajeva, nazyvajučy jaho svaim chaŭruśnikam.
«Ułada spałochałasia majho pieršaha vystupu i vystupu Uładzimira Niaklajeva», — havaryŭ jon.
Šmat uvahi kandydat nadaŭ padčas pramovy spravie Biabienina. Andrej Sańnikaŭ zaznačyŭ, što ekśpierty ABSIE, jakija zajmalisia razhladam materyjałaŭ spravy, pažadali zastacca ananimnymi niezdarma. Na dumku kandydata, jany paviarchoŭna aznajomilisia z materyjałami spravy i nie byli zacikaŭlenyja ŭ tym, kab dajści da praŭdy. Pavodle dadzienych Sańnikava, adzin z hetych ekśpiertaŭ u svoj čas zajmaŭsia spravaj Aŭtuchoviča i taksama pryjšoŭ da vysnovy, što Aŭtuchovič źjaŭlajecca terarystam. «Paśla źmieny ŭłady sprava Biabienina budzie raskryta», — paabiacaŭ kandydat.
Andrej Sańnikaŭ asobna spyniŭsia na svajoj prahramie pad nazvaj «Mocnaja Biełaruś dla svabodnych ludziej».
«Biełaruś čas viarnuć ludziam, nacyja vymiraje. Za čas kiravańnia Łukašenki nas stała mienš na 800 tysiač», — zaznačyŭ Andrej Sańnikaŭ u svaim vystupie.Pavodle kandydata, paśla prychodu da ŭłady jon skliča Kanstytucyjny schod, jaki praviadzie kardynalnyja pieramieny ŭ krainie: źmienšyć uładu prezidenta, uzmocnić parłamient, stvoryć niezaležnuju sudovuju sistemu.
Sańnikaŭ taksama paabiacaŭ stvaryć admysłovuju kamisiju, jakaja zojmiecca pierahladam niepravamocnych vyrakaŭ. «Ja sam siadzieŭ. Prasiedzieŭ 15 sutak na Akreścina za łozunh «Za lepšaje žyćcio», — paviedamiŭ Sańnikaŭ.
Sacyjalnaja i ekanamičnaja prahrama Andreja Sańnikava palahaje, pavodle jaho słovaŭ, na viartańni da sacyjalnaj ekanomiki.
«My vierniem ilhoty, budziem vypłočvać hrošy maładym siemjai i maładym baćkam, dapamožam z nabyćciom žylla, abaviazkovaje raźmierkavańnie studentaŭ budzie admienienaje», — abiacaŭ Sańnikaŭu svaim televystupie. Kab usio heta zrabić, nieabchodnyja niemałyja srodki. Kandydat Sańnikaŭ miarkuje atrymać ich u vyniku pieraŭtvareńniaŭ u haspadarcy krainy. A mienavita praz «vyzvaleńnie pryvatnaj inicyjatyvy, novuju industryjalizacyju i pryciahnieńnie ŭ krainu suśvietnych brendaŭ». «Pieršasnaść zakonaŭ, niedatykalnaść pryvatnaj ułasnaści — i dziasiatki inviestaraŭ adrazu pryjduć u Biełaruś», — pierakanany Andrej Sańnikaŭ.
Skančajučy apisańnie svajoj prahramy, kandydat raspavioŭ ab słovach svajho znajomaha aŭtamajstra — «Čas źmianiać łysuju humu na kołach».
Havoračy ab zamiežnaj palitycy, Sańnikaŭ paabiacaŭ, što praz 5–7 hadoŭ paśla pieramohi Biełaruś abaviazkova stanie siabram ES, adnak pry hetym zachavaje samyja ciesnyja stasunki z Rasijaj i Ukrainaj. «Heta našy stratehičnyja partniory», — zaznačyŭ jon. Pryjarytetam taksama nazvaŭ ustupleńnie Biełarusi ŭ Suśvietnuju handlovuju arhanizacyju, a siabroŭstva ŭ Mytnym sajuzie — «časovym, vymušanym krokam».
Pierajšoŭšy na biełaruskuju movu, Andrej Sańnikaŭ paabiacaŭ viarnuć paśla pieramohi nacyjanalnyja simvały, nadać im status adzinych dziaržaŭnych.
«Łukašenka ŭvioŭ niejkija svaje skažonyja simvały. Jakija simvały, takoje i žyćcio», — zajaviŭ jon.Paśla prychodu da ŭłady taksama paabiacaŭ viarnuć volnyja ad pracy dni padčas važniejšych relihijnych śviataŭ.
Zaviaršaŭsia vystup Andreja Sańnikava zaklikami da aktyŭnaj hramadzianskaj pazicyi padčas prezidenckich vybaraŭ. «Kali my zaraz pojdziem spać, to možam i nie pračnucca». Kandydat zaklikaŭ moładź pryjści na Płošču 19 śniežnia razam sa svaimi siabrami, kab adstojvać svaje pravy. Žančyn paprasiŭ «nie trymać svaich mužoŭ la spadnic».
Zaviaršaŭsia vystup upeŭnienymi słovami «Historyja robicca siońnia, historyju robim my, i my pieramožam!».
