Siońnia ŭ efiry biełaruskaha radyjo prahučali druhija vystupy kandydataŭ u prezydenty Alesia Michaleviča i Vitala Rymašeŭskaha. U adroźnieńnie ad Uładzimiera Niaklajeva, jaki ŭčora paŭtaryŭ svoj vystup ź minułaha tydnia, siońnia kandydaty pieravažna nie paŭtaralisia.
Źmiest ahučanych ranicaj kandydackich zvarotaŭ da vybarščykaŭ my abmiarkoŭvajem z našym ahladalnikam Uładzimieram Hłodam.
Abłamiejka: Uładzimier, na što vy źviarnuli ŭvahu ŭ radyjovystupie Alesia Michaleviča?
Hłod: Ja źviarnuŭ uvahu najpierš na toje, što heta byŭ aryhinalny vystup. Jon ničoha nie paŭtaryŭ sa svaich raniejšych zvarotaŭ da vybarcaŭ, jak radyjnych, tak i televizijnych. Pramaŭlaŭ vyklučna na biełaruskaj movie. Jaho vystup achoplivaŭ tolki sferu kultury, i, zrazumieła, na inšaj movie vystupu i nie mahło być. Svaju hałoŭnuju tezu Aleś Michalevič sfarmulavaŭ tak: kab kulturny brend «Made in Belarus» staŭ častkaju ahulnabiełaruskaha brendu.
Kandydat abmalavaŭ sytuacyju, jakaja ciapier jość u Biełarusi z movami, ź dźviuchmoŭjem. Jon skazaŭ, što dziaržaŭnyja čynoŭniki vymušanyja być ruskamoŭnymi i patłumačyŭ, čamu tak atrymlivajecca — uschodni vektar palityki, nakiravanaść Biełarusi na Maskvu da hetaha prymušajuć. Ale što mianie ździviła ŭ vystupie Michaleviča, dyk heta toje,
što hałoŭnym voraham biełaruščyny, pavodle jaho, źjaŭlajecca ministerstva kultury. Ale ž viadoma, što heta, miakka kažučy, nie zusim tak.
Mahčymaści ŭ ministerstva i ŭ jaho kiraŭnika — abmiežavanyja. I abmiažoŭvaje ich viadoma chto — heta kiraŭnik biełaruskaj dziaržavy, jaki nia raz dazvalaŭ sabie davoli ździekliva vykazvacca nakont rodnaj movy. I voś ja źviarnuŭ uvahu, što niekalki dzion tamu, kali Alaksandar Łukašenka razmaŭlaŭ sa svaimi davieranymi asobami, jon skazaŭ, što kali apazycyjnyja kandydaty zachopiać uładu, jany praviaduć hvałtoŭnuju biełarusizacyju.
I voś mianie ździviła, što ŭ svaim vystupie Aleś Michalevič hetuju tezu nie abvierh.
U takim padychodzie, na maju dumku, hałoŭnaja słabaść jaho siońniašniaha radyjozvarotu. Jak mnie zdajecca, heta samy słaby z usich jaho čatyroch vystupaŭ. Možna było b padumać, što nie chapiła času, ale jon ukłaŭsia ŭsiaho ŭ 20 chvilinaŭ, zamiest zaplanavanych 30. Moj kaleha Valer Karbaleivč, jaki analizavaŭ pieršyja vystupy Michaleviča, adznačyŭ, što jany bolš nahadvajuć lekcyju prafesara pierad studentami, i mnie zdajecca, što toje samaje možna skazać i siońnia, navat jašče i ŭ bolšaj stupieni. Faktyčna, i Aleś Michalevič heta pryznaŭ sam, bo skončyŭ svaju pramovu tym, što nazvaŭ svoj zvarot lekcyjaj dla vybarcaŭ. Tak i atrymałasia — heta sapraŭdy była lekcyja.
Abłamiejka: Nu, a zaraz, Uładzimier, pahavorym pra źmiest pramovy Vitala Rymašeŭskaha. Jon, jak viadoma, ciapier znachodzicca ź vizytam u Bruseli. Jakim čynam była arhanizavana jaho pramova i na jakija jaje punkty źviarnuli ŭvahu vy?
Hłod: Pramova hetaja, jak ja daviedaŭsia, była zapisanaja raniej, siońnia jana hučała nie ŭ žyvym efiry, ale ŭ zapisie. Zapisana jana była pierad tym, jak Rymašeŭski palacieŭ u Brusel. Maju ŭvahu najpierš pryciahnuŭ toj fakt, što siońnia znoŭ, jak i ŭ papiarednich vystupach, Vital Rymašeŭski havaryŭ pra chryścijanstva i chryścijanskija kaštoŭnaści. U hetym sensie, na moj pohlad, Vital Rymašeŭski samy partyjny z usich kandydataŭ u prezydenty. Bo va ŭsich biez vyklučeńnia svaich zvarotach da vybarcaŭ jon robić akcent na toje, što jon pradstaŭnik chryścijanskaj demakratyi. Jašče adna rysa, jakaja prachodzić praz usie vystupy Rymašeŭskaha — jon rezka krytykuje ŭłady. Heta z adnaho boku. A ź inšaha, jon daje i svaju stanoŭčuju prahramu i pakazvaje, čaho možna dasiahnuć. I što jašče pryvablivaje ŭ vystupie hetaha kandydata, heta toje, što jon havoryć zrazumiełymi dla ludziej słovami. I voś siońnia jon kazaŭ pra toje, što kali da ŭłady pryjdzie chryścijanskaja demakratyja, to hałoŭnym vymiareńniem žyćcia biełarusa budzie nie pakaźniki vałavoha ŭnutranaha praduktu abo inflacyja, a praciahłaść žyćcia biełarusa, kolkaść aŭtamabilaŭ u siamji, najaŭnaść svajho domu.
I jašče mnie spadabałasia ŭ Rymašeŭskaha, što jon tłumačyć, adkul voźmucca hrošy.
Jon abiacaje kredyty pad try pracenty, bo Łukašenka ich biare na Zachadzie pad try pracenty, abiacaje tańniejšy benzin, bo nia budzie navaru dla dziaržavy, abiacaje bolšyja pensii, bo samyja mocnyja pradpryjemstvy buduć pieraličvać hrošy ŭ pensijnyja fondy. Jak mnie zdajecca, heta pavinna pryvabić vybarcaŭ da Rymašeŭskaha, bo jon nia tolki kaža, što zrobić, ale i kaža, jak zrobić.
