Na vulicach stalicy pakul vobmal ahitacyjnych ulotak. Kalarovyja tolki ŭ Ramančuka.
Na ahitacyjnych ctendach pakul pustavata.
Ulotka Rymašeŭskaha była prymierkavanaja da vystupu, ahitka Sańnikava vyhladaje słabavata.
Michalevič nie ŭpeŭnieny, što heta plon pracy jaho štaba.
Štab Łukašenki nie raźmieńvajecca na drabiazu (płakat na zadnim płanie).
Z momantu dazvołu na ahitacyju za kandydataŭ u prezidenty minuŭ tydzień. Ale na ahitacyjnych ctendach, raźmieščanych na vulicach stalicy, pakul pustavata. U centry horada možna pabačyć ahitacyjnyja materyjały tolki čatyroch kandydataŭ: Alesia Michaleviča, Jarasłava Ramančuka, Vitala Rymašeŭskaha i Andreja Sańnikava.
Vonkava najbolš pryvabnymi vyhladaje ulotka Ramančuka: jana adzinaja pakul kalarovaja, imia i proźvišča kandydata, a taksama jahony pieradvybarčy łozunh bačnyja zdala, tekst ulotki łakaničny i čytelny.
Ulotka Rymašeŭskaha na siońnia ŭžo sastareła, bo zaklikaje da prahladu jahonaha vystupleńnia na telebačańni 22 listapada. Tym nie mienš, proźvišča kandydata dobra bačnaje, a podpis «Jon skaža toje, pra što ŭsie maŭčać» intryhuje.
Ulotka Sańnikava vyhladaje słabavata. Dźvie trecija płoščy zajmaje tekst, nabrany drobnym šryftam. Rešta — fota kandydata. Jano nie partretnaje, čorna-biełaje i ćmianaje.
Akramia taho, na ahitacyjnych stendach źjavilisia i ŭlotki biez fotazdymka, z łakaničnym źmiestam. Na ich napisana «Michalevič ili Łukašienko» (u kancy skaza niama pytalnika), litara «m» u proźviščy Michaleviča vyłučanaja čyrvonym koleram. Jak apynułasia, kandydat u prezidenty pra isnavańnie takoj ulotki ŭpieršyniu daviedaŭsia ad «NN». Jon nie ŭpeŭnieny, što heta plon pracy jaho štaba.
Vyhladaje, što inšyja kandydaty ŭ prezidenty pakul nie zacikavilisia mahčymaściu dadatkovaj ahitacyi. U tym liku i kamanda Alaksandra Łukašenki, jakaja na drobiazi nie raźmieńvajecca, pra što ŭskosna śviedčyć źjaŭleńnie prapahandysckich płakataŭ u stalicy na minułym tydni.
