Uśled za tryma byłymi salistkami papiaredniaha składu «Toples» znajšła svoj šlach i čaćviertaja — sa znakavym u Biełarusi proźviščam Łukašenka. Biełaruskaja krasunia źjavicca aholenaj u rasijskaj viersii časopisa Maxim.
Jak viadoma, Volha Vajniłovič i Lera Baciakova pakul abrali šlach chatnich haspadyniaŭ, vyjšaŭšy zamuž za šoŭmena Vadzima Hałyhina i biznesoŭca Uładzimira Kajavu adpaviedna. Hanna Homanava piša i pradaje ŭłasnyja karciny. Vyznačyłasia z rodam dziejnaści i Taćciana Łukašenka — taksama samastojnaja tvorčaja adzinka.
Spačatku jaje možna budzie ŭbačyć u rasijskaj viersii časopisa Maxim, u raździele «Chto hetaja dziaŭčyna?» Simvalična, što biełaruska z proźviščam Łukašenka źjavicca mienavita ŭ śniežańskim numary hlancu — u miesiac, kali na radzimie buduć prachodzić prezidenckija vybary.
— U hetaj rubrycy drukujucca fotasiesii dziaŭčat, jakija źjaŭlajucca tvarami rekłamnych rolikaŭ, — raskazała «Salidarnaści» Taćciana. — Ja źniałasia ŭ rekłamie šakaładnych batončykaŭ «Nuts» u roli vaviorki.Hety rolik možna ŭbačyć u Biełarusi, Kazachstanie, Rasii. Voś mianie i zaprasili. Źlotała, źniałasia, viarnułasia…
Na pytańnie pra ŭmovy zdymak surazmoŭnica adkazvać nie zachacieła.
My prapanujem vybranaje ź intervju Tani Łukašenka dla MAXIM.
— Raskažy, kali łaska, scenar rolika. Raptam nie ŭsie čytačy jaho bačyli.
— Ja biahu ź vielizarnym arecham i na poŭnaj chutkaści ŭrazajusia ŭ natoŭp hihanckich sinich amierykanskich futbalistaŭ. I ŭ vyniku ŭ mianie ad hetaha arecha atrymaŭsia voś taki siniak! Praŭda, im potym režysior rastłumačyŭ, što jany ŭsio ž pavinny rasstupacca choć niejak, inakš ja prosta ab ich zabjusia. I dalej było ŭžo nie tak baluča.
— Heta byŭ tvoj debiut ci ty vieteran rekłamy?
— Nie toje kab vieteran, ale rekłamavała ja mnohaje. Naprykład, pajasy dla pachudzieńnia. Heta kali spačatku pakazvajuć poŭnuju žančynu, a potym jaje ž, ale dobra schudniełuju. Ja zaŭsiody pakazvała ŭžo schudniełuju.
— A nakont ułasnaj fihury i vahi ŭ ciabie jość niejkija kompleksy? Prosta vielmi časta navat tyja žančyny, što vyhladajuć idealna, sprabujuć chudzieć nyjuć, što jany vielmi toŭstyja.
— Nu nie viedaju. Mianie ŭ sabie ŭsio zadavalniaje. Nikoli nie siadzieła na dyjetach i navat chaču krychu papravicca.
— Raniej ty śpiavała ŭ hrupie «Toples». Vy sapraŭdy vystupali toples?
— Viadoma, nie! Ale pradusar ličyŭ, što nazva musić pryciahvać publiku, a na dyski i klipy hrošaj škadavaŭ. Vielmi stamlali sucelnyja hastroli i pierajezdy. U vyniku našaja hałoŭnaja błandynka vychodziła na scenu pierad vielizarnym natoŭpam na płoščy i kryčała: «Pryvitańnie, Baranavičy!» Choć heta byli nie Baranavičy, a Babrujsk. Ujaŭlaješ, jak hety natoŭp reahavaŭ?
— Hałoŭnaje, što žyvaja zastałasia. I jakija dalejšyja płany?
— Ja pišu pieśni i chaču zrabić svoj solny prajekt. Pakłaści ich na muzyku i vykanać pad fartepijana. Tolki pradusara niama.
— Kamu patrebny pradusar, kali jość Youtube? Kali ty hienijalnaja, narod heta tut ža razašle adno adnamu, i da ciabie pryjdzie słava.
— Prablema ŭ tym, što ja vielmi samakrytyčnaja. Mnie treba spačatku samoj pierakanacca, što ŭ mianie atrymlivajecca dobraja muzyka, i tolki potym vynosić na sud hledačoŭ.
Pa słovach Taćciany, pytańnie z ułasnym raźvićciom jak samastojnaj tvorčaj adzinki — sapraŭdy tolki pytańnie času.
— Vykłaści svaje pieśni na youtube.com — heta dobraja ideja. Ciapier staić pytańnie, jak heta pradstavić hledaču. Tak što heta sprava času, — skazała Łukašenka «Salidarnaści».
Bolš za toje, dziaŭčyna padzialiłasia najbližejšymi płanami na budučyniu, jakija vyjavilisia nie mienš cikavymi.
Užo pačynajučy ad hetych vychodnych prychilniki zmohuć bačyć Taćcianu ŭ efiry telekanała«RTR-Biełaruś» — u roli viadučaj prahnozu nadvorja paśla subotniaha vypusku navin.
My ŭžo było paspadziavalisia, što dziela pavyšeńnia rejtynhaŭ hety telekanał budzie pierajmać niamiecki dośvied, dzie tranślujuć pikantny prahnoz z dyktarkami u seksualnym adzieńni… Ale nie.
Jak zapeŭniła nas Taćciana Łukašenka, u efiry jana budzie źjaŭlacca vielmi navat adzietaj. Praŭda, na jaje dumku, nievialikaje dekalte ŭ błuzcy budzie
