13 listapada ŭ Minsku adbyłasia navukovaja kanfierencyja, pryśviečanaja 660-hodździu z dnia naradžeńnia vialikaha kniazia Vialikaha Kniastva Litoŭskaha Vitaŭta i 600-hodździu pieramohi pad Hrunvaldam.
Arhanizataram kanfierencyi, u jakoj udzielničali vučonyja z roznych haradoŭ Biełarusi, vystupiŭ respublikanski hramadski arhkamitet pa śviatkavańni hetych dat na čale z doktaram histaryčnych navuk Anatolem Hryckievičam.
Doktar histaryčnych navuk Juryj Bochan adznačyŭ, što Vitaŭt zdoleŭ umacavać samastojnaść VKŁ, dabicca jaje dypłamatyčnaha pryznańnia z boku Zachodniaj Jeŭropy i terytaryjalna pašyryć dziaržavu. Pavodle jaho słoŭ, dziejnaść Vitaŭta źjaŭlałasia łahičnym praciaham dziaržavatvorčaj palityki ŭsich jaho papiarednikaŭ, dazvoliła zachavać padmurki ekanamičnaha i palityčnaha raźvićcia VKŁ, a taksama padoŭžyć isnavańnie hetaj dziaržavy jašče na 150 hadoŭ.
Akademik Nacyjanalnaj akademii navuk Biełarusi Michaił Kaściuk adznačyŭ, što pieramoha abjadnanych vojsk Polskaha karaleŭstva i VKŁ nad armijaj Teŭtonskaha ordena pad Hrunvaldam stała vynikam Vialikaj vajny 1409—1410 hadoŭ. Pavodle jaho słoŭ, hety vynik śviedčyŭ, što padrychtoŭčyja dziejańni z boku Polščy i VKŁ byli bolš hruntoŭnymi, uzvažanymi i efiektyŭnymi. "Vitaŭt i Jahajła pierajhrali kryžanoscaŭ", — skazaŭ vučony. Jon źviarnuŭ uvahu na vysakarodnyja pavodziny ŭdzielnikaŭ vajny, jakija padčas jaje nie prajavili vierałomstva i ni razu nie parušyli raniej padpisanych damoŭ.
Doktar histaryčnych navuk Hieorhij Halenčanka padkreśliŭ, što "pieramoha pad Hrunvaldam była abumoŭlenaja unijaj Polskaha karaleŭstva z VKŁ", bo, na jaho dumku, kožnaja z hetych dziaržaŭ sama pa sabie nie mahła vyrašyć vajenna-stratehičnych i palityčnych prablem. Da stratehičnych pamyłak Teŭtonskaha ordena vučony adnios razdroblenaść armii kryžanoscaŭ i płanavańnie vajny pa-za miežami ordena. "Naadvarot, polska-litoŭskaje vojska nie drabiła svaje siły i zachoŭvała stratehičnuju inicyjatyvu, dziejničajučy na terytoryi Teŭtonskaha ordena", — skazaŭ Halenčanka. Pavodle jaho słoŭ, ab bolšaj aktyŭnaści charuhvaŭ VKŁ na Hrunvaldskim poli śviedčyć toj fakt, što asnoŭnyja straty ŭ abjadnanym vojsku panieśli mienavita litoŭcy.
Historyki aznajomilisia ź mižnarodnaj mastackaj vystavaj, arhanizavanaj Biełaruskim sajuzam mastakoŭ da jubilejnych dat.
U 19.00 u Minskim kaściole Śviatych Symona i Aleny (Čyrvonym kaściole) adbudziecca kancert duchoŭnaj muzyki ŭ honar pieramohi pad Hrunvaldam.
