Fiestyval arhannaj muzyki «Zvany Safii»

U kancertnaj zale Safijskaha sabora Połacka z 28 kastryčnika pa 28 listapada projdzie XV Mižnarodny fiestyval arhannaj muzyki «Zvany Safii». Sioleta jon pravodzicca ŭ ramkach respublikanskaj akcyi «Kulturnaja stalica 2010 hoda — Połacak» i pryśviačajecca 25-hodździu arhana Safijskaha sabora.

Jak paviedamili ŭ kancertnym adździele Nacyjanalnaha połackaha historyka-kulturnahamuzieja-zapaviednika, na jubilejnym fiestyvali buduć pradstaŭleny arhannyja vykanalnickija škoły ź piaci krain — Biełarusi, Rasii, Polščy, Aŭstryi i Rumynii.

Adkryje fiestyval dyrektar Polskaj bałtyjskaj fiłarmonii, hałoŭny arhanist Hdańskaha kafiedralnaha sabora Raman Piarucki. U jaho vykanańni prahučać tvory Bacha, Miendelsona, Šapena, Suržynskaha.

4 listapada ŭ Safijskim sabory ŭ ansambli ź simfaničnym arkiestram Nacyjanalnaj dziaržaŭnaj teleradyjokampanii Biełarusi i dyryžoram Česłavam Hraboŭskim (Polšča) vystupić biełaruskaja arhanistka i kampazitar Volha Padhajskaja. Jana pradstavić svaje aŭtarskija tvory i kłasičnuju arhannuju muzyku — tvory Hiendela, Vivaldzi.

11 listapada prychilniki arhannaj muzyki pačujuć svaju ziamlačku — arhanistku Ksieniju Paharełuju, jakaja vystupić u ansambli ź minskaj muzyčnaj kapełaj «Sanorus» (dyryžor Alaksiej Šut). U fiestyvalnaj prahramie jość jašče adzin kancert połackaj arhanistki. 14 listapada vystupleńnie Paharełaj budzie supravadžać kamierny arkiestr «Jeŭropa-centr» pad kiraŭnictvam dyryžora Raila Sadykava. Na hetym kancercie prahučyć arhannaja kłasika, a taksama tvory rasijskaha arhanista i kampazitara Aleha Jančanki, jaki 25 hadoŭ tamu ŭpieršyniu raskryŭ unikalnyja mahčymaści arhana ŭ połackim Safijskim sabory.

21 listapada na połackim fiestyvali ŭpieršyniu vystupić vykanaŭca z Aŭstryi Nataša Rajch. Jana pradstavić prahramu «Aŭstryjskaja muzyka piaci stahodździaŭ».

27 listapada połackija prychilniki arhannaj muzyki paznajomiacca z rasijskaj arhannaj vykanalnickaj škołaj: u Safijskim sabory budzie ihrać maładaja vykanaŭca Maryja Makaranka, jakaja na druhim adkrytym fiestyvali-konkursie maładych arhanistaŭ Soli Deo Gloria (Maskva, 2008) u jakaści śpiecpryza hanaravałasia vystupleńniem u Vatykanie na liturhii z udziełam papy rymskaha.

Zavieršyć fiestyval 28 listapada kancert muzyki Fielicyjana Roski (Rumynija), u vykanańni jakoha prahučyć staradaŭniaja arhannaja muzyka XVII–XIX stahodździaŭ.

0

0

0

0

0

0

Taćciana Maćviejeva, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH