Vizit prezidenta Litvy Dali Hrybaŭskajcie ŭ Biełaruś nie źjaŭlajecca padtrymkaj Alaksandra Łukašenki pierad vybarami. Pra heta zajaviŭ pamočnik prezidenta Łaŭrynas Jonavičus u intervju litoŭskaj radyjostancyi Ziniu radijas.
«Prezidentu Biełarusi padtrymka na vybarach nie patrebna — jon adčuvaje siabie vielmi ŭpeŭniena. Akramia taho, zaklik pravieści prazrystyja, demakratyčnyja, adkrytyja vybary moža być vykazany tolki pierad vybarami. Jak havorycca, paśla bojki kułakami nie machajuć, tamu było b niełahična jechać paśla vybaraŭ i pieradavać hetuju viestku postfaktum», — skazaŭ daradca.
Pavodle słoŭ Jonavičusa,
Hrybaŭskajcie naviedała Biełaruś u suviazi z majučym adbycca ŭ 2011 hodzie staršynstvam Litvy ŭ ABSIE.
«My prymajem staršynstva ŭ ABSIE u nastupnym hodzie. Vizit, pa sutnaści, pieraśledavaŭ hetuju asnoŭnuju metu — pieradać Biełarusi, jaje kiraŭniku, viestku ab našych čakańniach, čakańniach ABSIE, jeŭrapiejskich krain u suviazi sa svabodnymi, demakratyčnymi i adkrytymi vybarami. Vybary — heta važny kryteryj u acency budučych adnosin ES i ŭsich krain Jeŭropy ź Biełaruśsiu. Heta ahulnaja pazicyja jeŭrapiejskich krain. Litva prosta vykanała toje, što pavinna była», — skazaŭ savietnik prezidenta.
Pavodle jaho mierkavańnia, dobryja adnosiny pamiž Litvoj i Biełaruśsiu pavinny prynieści karyść nie tolki Jeŭropie, ale i Rasii. «Jak ja miarkuju, dobryja adnosiny pamiž Litvoj i Biełaruśsiu — heta asnoŭnaja meta, ahulny intares i, kali jany buduć dobrymi, heta budzie na karyść jak Jeŭropie, tak i Rasii. Vielmi takaja prostaja acenka. Naša meta — mieć dobryja dvuchbakovyja adnosiny, najpierš ź Biełaruśsiu ŭ dadzienym vypadku», — padkreśliŭ Jonavičus.
Nahadajem, Dala Hrybaŭskajcie naviedała Biełaruś 20 kastryčnika. Šerah biełaruskich i litoŭskich palitołahaŭ rascanili jaje rabočy vizit u Minsk jak padtrymku Alaksandra Łukašenki napiaredadni vybaraŭ prezidenta Biełarusi.
