Meram prymorskaha miastečka Piran u Słavienii staŭ Piter Bosman. Jon pieramoh u druhim tury vybaraŭ z krychu bolš jak 50 adsotkami hałasoŭ. I choć u Piranie ŭsich žycharoŭ 4 tysiačy z hakam (z vakolicami nabiarecca pad 17), ale navina ablacieła ŭvieś śviet. Dziva što — mer ta čarnaskury. Upieršyniu siarod słavianskich krain!
Piter Bosman naradziŭsia ŭ Hanie, u 70-ja hady pryjechaŭ u Słavieniju pa navuku, a znajšoŭ šče i žonku dy druhuju radzimu. Na słavienskim uźbiarežžy ŭ jaho svoj miedycynski centr. Sajt ź jaho proźviščam tak i raskazvaje pra Bosmana-doktara. A jak palityk Bosman aktyŭna karystaŭsia videaservisami, dzie prajšoŭsia pa hałoŭnych prablemach nievialikaha rehijona i paabiacaŭ biaspłatny wi-fi.
Na pytańnie, ci ciažka dałasia jamu pieramoha, Bosman adkazaŭ — biez prablem. A voś supiernik Bosmana narakaje, što takoha kandydata i nie pakrytykuješ jak śled, kab nie navieści padazreńniaŭ u rasavaj nieciarpimaści, voś ža j vynikaje, što ŭ čarnaskuraha palityka šancaŭ bolej ad startu.
.
Słaviency nie pieršy raz ździŭlajuć svaim vybaram. U 2008-m jany ŭźviali na prezidencki post čałavieka ź nieviadomaj słavienskamu ałfavitu litaraj u proźviščy — Türk. Što praŭda, vyvučać praviły vymaŭleńnia «u-umlaŭta» navat dziela prezidenta słaviency nie stali i nazyvajuć jaho prosta — Daniła Cirk.