«Masakra» apraŭdała čakańni 17

Žurnalist «Našaj Nivy» atrymaŭ mahčymaść pabačyć stužku Kudzinienki na pres-pakazie.

Heta stužka «Biełaruśfilma», ale heta nie «Biełaruśfilm». Heta niešta kardynalna novaje pa stylistycy i zadačach.

Mistyka, lohkaja erotyka, biełaruskija lehiendy. Chtości nazvaŭ heta «bulba-chorar». Niaŭdała. Prosta «novaje biełaruskaje kino».

Chacia ŭ filmie hieroi razmaŭlajuć na biełaruskaj, polskaj, ale bolš rasiejskaj movach, heta čysta biełaruskaja stužka, źjava biełaruskaj kultury, jak filmy Kusturycy — źjavy kultury sierbskaj.

U savieckija časy ekranizavali tvory Karatkieviča, Mieleža, Adamčyka, ale bolšaść tych stužak biełaruskimi byli tolki pa prynaležnaści aŭtaraŭ. «Masakra» adkryvaje ŭ hetym sensie novy aśpiekt.

Padziei «Masakry» adbyvajucca ŭ Biełarusi ŭ 1860-ch hadach, paśla paŭstańnia Kalinoŭskaha. Kraj zdranćvieŭ paśla teroru. Zabaroniena trymać navat strelby. A hości hrafa Pazurkieviča, hienierał i jaho syn-vajskoviec, usialak prynižajuć tutejšych. Małady aficer nazyvaje «polskija» šabli nikčemnymi ŭ paraŭnańni z rasiejskimi. I atrymlivaje ad haspadara pa azadku hetaj šablaj, što pryvodzić aficera ŭ šalenstva.

Siužet filma vybudoŭvajecca vakoł luboŭnaha trochkutnika — hraf Pazurkievič — Hanna — Mikałaj Kazancaŭ.

U pałac da hrafa Pazurkieviča pryjazdžaje małady mastak Mikałaj Kazancaŭ, jaki vydaje siabie za prafiesara ź Pieciarburha. Avanturyst źbirajecca katałahizavać redkuju biblijateku, za što raźličvaje zarabić hrošaj na vučobu ŭ Vieniecyi. A ŭ pałacy rychtujucca da viasiella Uładzimira Pazurkieviča z maładoj Hannaj. Ale akazvajecca, što žančyna stała kachankaj Kazancava. Jana prosić nierašučaha maładoha čałavieka źvieźci jaje ad hrafa, jakoha ŭžo zusim i nie kachaje.

Pazurkievič, pradčuvajučy zdradu, zabivaje ŭsich haściej.

Ale sam hinie ad ruki mastaka-avanturysta. Hanna ŭ vyniku nie stanovicca ničyjoj žonkaj, a varjacieje.

Siužet prosty. Kali nie ličyć, što Uładzimir Pazurkievič pieratvarajecca ŭ miadźviedzia. Hetuju rolu, darečy, ihraŭ sapraŭdny miadźviedź pa mianušcy Ściopa.

Akramia miadźviedzia, u filmie źnialisia rasiejskija akciory Dźmitryj Miler (Pazurkievič), Andrej Nazimaŭ (Kazancaŭ), Maryja Kudranievič (Hanna), biełarusy Nastaśsia Zielankoŭskaja, Aleh Harbuz, Siarhiej Žuraviel, Alaksandr Kołbyšaŭ… Režysior — Andrej Kudzinienka, scenaryst — Alaksandr Kačan.

Biudžet ža filma skłaŭ piać miljardaŭ biełaruskich rubloŭ.

Heta robić karcinu adnoj z najdaražejšych u historyi biełaruskaha kiniematohrafa. Usio dobra, kali b nie devalvacyja. Jak kažuć asoby, blizkija da Kudzinienki, hrošaj usio ž nie chapiła na naležnyja kamputarnyja efiekty. Zrešty, stužka ŭsio adno hladzicca vidoviščna.

27 kastryčnika ŭ kinateatry «Kastryčnik» adbudziecca zakryty pakaz filma.

7 listapada projdzie hladacki prahlad u miežach kinafiestyvalu «Listapad», a 11-ha pieršy film novaj ery biełaruskaha kino čakaje nacyjanalnaja premjera.

Kastuś Matušyč

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH