Pretendent u prezidenty pradprymalnik ź Viciebska Uładzimir Pravalski zajaviŭ pra vykradańnie brata Juryja.
Jak paviedamiŭ sajtu «Pravaabaroncy za svabodnyja vybary» Uładzimir Pravalski, jaho brata Juryja zatrymali 15 kastryčnika na vulicy, kali jon viartaŭsia z pracy. Pavodle słoŭ Pravalskaha, da jaho brata pad`iechała mašyna, ź jaje vyjšli čatyry supracoŭniki milicyi, biez tłumačeńniaŭ zatrymali Juryja i advieźli ŭ Pieršamajski RAUS Viciebska.
«U viečar zatrymańnia my vyśvietlili tolki toje, što brat u Pieršamajskim RAUS. Pryčyn zatrymańnia nam nichto nie nazvaŭ, i naohuł supracoŭniki rajadździeła zajavili, što Juryja Pravalskaha ŭžo pavieźli ŭ izalatar časovaha ŭtrymańnia. My nakiravalisia tudy, ale tam brata nie było. Viarnulisia ŭ rajadździeł. Ja napisaŭ skarhu na imia načalnika — čamu nas padmanvajuć i nie havorać, što zdaryłasia. Nazaŭtra, u subotu, my znoŭ pryjechali ŭ milicyju. I tut mnie pašancavała — ja ŭbačyŭ Juryja, jakoha kudyści viali, i jon paśpieŭ kryknuć, što jamu chočuć zrabić ukoł», — skazaŭ Pravalski.
Pretendent u prezidenty ličyć, što jaho brata vykrali, bo svajakam nie havaryli, ni dzie jon znachodzicca, ni pryčyn zatrymańnia. Uładzimir Pravalski ličyć, što heta było zroblena, kab pieraškodzić zboru podpisaŭ za vyłučeńnie jaho kandydatam na pasadu prezidenta.
Pravalski źviarnuŭsia ŭ niezaležnyja ŚMI, čaho nikoli nie rabiŭ raniej, bo na dapamohu aficyjnych struktur užo nie raźličvaŭ. Litaralna praz paŭhadziny paśla taho, jak źviestki ab zatrymańni brata ź`iavilisia ŭ internecie, Juryja adpuścili (16 kastryčnika pryblizna ŭ 14.00).
«Maje svajaki — členy majoj inicyjatyŭnaj hrupy. I zamiest taho kab źbirać podpisy, što asabliva efiektyŭna ŭ vychadnyja, my pavinny byli sutki zajmacca pošukami Juryja. Jon raskazaŭ, što ŭ milicyi na jaho nie skłali ni adnaho pratakoła i navat nie rastłumačyli, čamu zatrymali. Ja padaju zajavu ŭ Hienieralnuju prakuraturu, bo liču, što heta była antyzakonnaja sproba pieraškodzić asobie, jakaja vyłučajecca na pasadu prezidenta», — zajaviŭ Pravalski.
