Redakcyja niedziaržaŭnaj haziety«Inform-prohułka» atrymała aficyjny zapyt ź Ministerstva handlu z patrabavańniem tłumačeńniaŭ z nahody raźmiaščeńnia na jaje staronkach rekłamy spadarožnikavaha telekanała «Biełsat».
U pryvatnaści, upraŭleńnie abarony pravoŭ spažyŭcoŭ i kantrolu za rekłamaj patrabuje, kab vydańnie da 22 kastryčnika pradastaviła jamu kopii paśviedčańnia ab svajoj dziaržaŭnaj rehistracyi; dakumient, jaki paćviardžaŭ by jurydyčny status zamiežnaha rekłamadaŭca («Biełsata»); damovy na vytvorčaść i (albo) raźmiaščeńnie zhadanaj rekłamy i akty vykananych rabot da ich; vypuski haziety, u jakich raspaŭsiudžvałasia zhadanaja rekłama, pačynajučy z krasavika hh.; piśmovyja tłumačeńni «pa sutnaści pytańnia».
Jak vynikaje ź lista, ministerstva ŭžo maje padazreńni nakont nievykanańnia niekatorymi vydańniami patrabavańniaŭ zakona «Ab rekłamie» i zaraz «manitoryć» vydańni, jakija rekłamavali na svaich staronkach «Biełsat».
Sapraŭdy,
jašče niekalki redakcyj rehijanalnych haziet paćvierdzili BAŽ, što atrymali anałahičnyja zapyty, i zaraz rychtujuć pakiety dakumientaŭ dla adpraŭki ŭ Minhandlu.
«Ministertva handlu, biezumoŭna, maje prava praviarać vykanańnie zakanadaŭstva ab rekłamie, a redakcyi ŚMI musiać jaho vykonvać, — prakamientavaŭ situacyju namieśnik staršyni BAŽ Andrej Bastuniec. — Nielha, adnak, nie źviarnuć uvahi na toje, što ŭ masavym paradku pravodzicca pravierka rekłamy mienavita telekanała «Biełsat», i da taho ž u pieryjad vybarčaj kampanii».
Juryst nahadvaje, što na praciahu hetaha hoda Minhandlu vystaŭlała taksama pretenzii da rekłamy «Biełsat TV» u hazietach «Novy čas» i «Narodnaja vola».